அடையாளம் தெரியாத வாகனம் மோதி மூதாட்டி பலி

நாட்டறம்பள்ளியை அடுத்த ஆத்தூர்குப்பம் பகுதியை சேர்ந்தவர் முனுசாமி. இவரது மனைவி வள்ளியம்மாள் (வயது 78). இவர் வாணியம்பாடி- கிருஷ்ணகிரி தேசிய நெடுஞ்சாலையில் நாட்டறம்பள்ளி அருகே தண்ணீர் பந்தல் என்ற இடத்தில் சாலையை கடக்க முயன்றார். அப்போது அந்த வழியாக வந்த அடையாளம் தெரியாத வாகனம் மோதியதில் வள்ளியம்மாள் சம்பவ இடத்திலேயே தலை நசிங்கி பரிதாபமாக உயிரிழந்தார்.

இதுகுறித்து தகவல் அறிந்ததும் நாட்டறம்பள்ளி போலீஸ் இன்ஸ்பெக்டர் மலர், சப்- இன்ஸ்பெக்டர் ரவிக்குமார் மற்றும் போலீசார் சம்பவம் இடத்திற்கு விரைந்து சென்று பிணத்தை கைப்பற்றி பிரேத பரிசோதனைக்காக திருப்பத்தூர் அரசு மருத்துவமனைக்கு அனுப்பி வைத்தனர். மேலும் இது குறித்து போலீசார் வழக்குப் பதிவு செய்து விசாரணை நடத்தி வருகின்றனர்.