முன்னாள் இந்திய கப்பல் படை மாலுமி உருவப்படம் திறப்பு

லால்குடியை அடுத்த புதூர் உத்தமனூர் கிராமத்தைச் சேர்ந்தவர் செபாஸ்டின். இந்திய கப்பல் படையில் மாலுமியாக பணிபுரிந்து வந்தார். இந்த நிலையில் 1971-ல் இந்தியா-பாகிஸ்தான் இடையே நடந்த போரில் கராச்சியில் துறைமுகத்தில் கப்பல் படை ஐ.என்.எஸ். குக்கரில் பணிபுரிந்த போது செபாஸ்டின் பலியானார். அவரது 51-ம் ஆண்டு நினைவு தினத்தையொட்டி, அவருடைய சொந்த கிராமம் அருகே உள்ள மகிழம்பாடியில் முன்னாள் ராணுவ வீரர் குடியிருப்பு வளாகப் பகுதியில் வீர சக்கரா மதலை முத்து நினைவிடத்தில் செபாஸ்டின் உருவப்படம் அமைக்கப்பட்டுள்ளது. இதன் திறப்பு விழாவிற்கு இந்திய கப்பல் படையின் திருச்சி ஸ்டேஷன் கமாண்டர் கேப்டன் ரமேஷ் தலைமை தாங்கினார். இதில் இந்திய கப்பற் படையின் ஓய்வூதிய அலுவலக அலுவலர் ஆண்டித்தேவர், முன்னாள் கமாண்டர் சிவகுமார் உள்பட பலர் பங்கேற்று புகழ் அஞ்சலி செலுத்தினர். இதில் செபாஸ்டின் மனைவி கிரேஸ் செபாஸ்டின், மகன் அமுதன் உள்பட பலர் கலந்து கொண்டனர்.