கிணற்றில் தவறி விழுந்து விவசாயி பலி

ஆம்பூரை அடுத்த குமாரமங்கலம் பகுதியை சேர்ந்தவர் ரமேஷ் பாபு (வயது 54). விவசாயி. இவர் நேற்று முன்தினம் தனது மோட்டார் சைக்கிளில் திருப்பத்தூர் சென்று வருவதாக கூறி வீட்டில் இருந்து சென்றார். நீண்ட நேரம் ஆகியும் அவர் வீடு திரும்பவில்லை. இதனால் அவரது குடும்பத்தினர் பல இடங்களில் தேடினர்.

இந்த நிலையில் நேற்று காலை அவரது விவசாய நிலம் அருகே சென்ற சிலர் ரமேஷ் பாபுவின் மோட்டார் சைக்கிள் அங்கு இருப்பதை பார்த்துள்ளனர். உடனே அவரது நிலத்தில் தேடியபோது கிணற்றில் ரமேஷ்பாபு பிணமாக கிடப்பதை கண்டனர். இதுகுறித்து உமராபாத் போலீசாருக்கு தகவல் தெரிவித்தனர். சம்பவ இடத்திற்கு விரைந்து வந்த போலீசார் ரமேஷ் பாபுவின் உடலை மீட்டு பிரேத பரிசோதனைக்காக ஆம்பூர் அரசு மருத்துவமனைக்கு அனுப்பி வைத்தனர். மேலும் இது குறித்து வழக்குப்பதிவு செய்து விசாரணை நடத்தி வருகின்றனர்.