சினிமா சண்டை பயிற்சியாளர் கனல் கண்ணன் பாளையங்கோட்டை சிறையில் அடைப்பு

நாகர்கோவில்:

மதபோதகர் குறித்து அவதூறு வீடியோ வெளியிட்ட வழக்கில் கைதான சினிமா சண்டை பயிற்சியாளர் கனல் கண்ணன் பாளையங்கோட்டை சிறையில் அடைக்கப்பட்டார்.

சண்டை பயிற்சியாளர்

சினிமா சண்டை பயிற்சியாளரும், இந்து முன்னணி அமைப்பின் கலை இலக்கிய பிரிவு மாநில செயலாளருமான கனல் கண்ணன் அவரது ட்விட்டர் கணக்கில் ஒரு வீடியோ பதிவிட்டார். அந்த வீடியோவில், கிறிஸ்தவ மத போதகர் அணியும் உடை அணிந்து வெளிநாட்டை சேர்ந்த ஒருவர் இளம்பெண்ணுடன் நடனமாடும் காட்சிகள் இருந்தன. அந்த வீடியோவின் பின்னணியில் தமிழ் திரைப்பட பாடலும் இணைக்கப்பட்டு இருந்தது.

இந்த வீடியோ காட்சி கிறிஸ்தவ மதத்தை இழிவுபடுத்தும் வகையில் இருப்பதாக கூறி திட்டுவிளையை சேர்ந்த தி.மு.க. பிரமுகர் ஆஸ்டின் பெனட் (வயது54) நாகர்கோவிலில் மாவட்ட போலீஸ் சூப்பிரண்டு அலுவலகத்தில் உள்ள சைபர் கிரைம் போலீஸ் நிலையத்தில் புகார் மனு அளித்தார். அதன்பேரில் கனல் கண்ணன் மீது போலீசார் வழக்குப்பதிவு செய்தனர்.

விசாரணைக்காக ஆஜர்

இந்தநிலையில் வழக்கு தொடர்பான விசாரணைக்காக கனல் கண்ணன் சைபர் கிரைம் போலீஸ் நிலையத்தில் நேற்று முன்தினம் காலை 10 மணிக்கு ஆஜரானார். அவரிடம் தொடர்ந்து விசாரணை நடத்தப்பட்டது. மதிய உணவு சாப்பிடக்கூட வெளியே விடாமல் போலீசார் விசாரணை நடத்தினர். அதன்பிறகு மாலை 6 மணி அளவில் திடீரென கனல் கண்ணன் கைது செய்யப்பட்டார்.

இந்த சம்பவம் இந்து முன்னணி மற்றும் பா.ஜனதாவினர் இடையே ஆத்திரத்தை ஏற்படுத்தியது. விசாரணை என்று வரவழைத்ததோடு மதிய உணவுக்கு கூட வெளியே அனுமதிக்காமல் கனல் கண்ணனை கைது செய்ததாக கூறி போலீஸ் சூப்பிரண்டு அலுவலகத்தில் தர்ணா போராட்டம் நடத்தினர். தொடர்ந்து போலீசார் நடத்திய பேச்சுவார்த்தைக்கு பிறகு சமாதானம் அடைந்தனர்.

சிறையில் அடைப்பு

இதற்கிைடயே கைது செய்யப்பட்ட கனல் கண்ணனை நாகர்கோவிலில் உள்ள 2-வது ஜூடிசியல் மாஜிஸ்திரேட்டு கோர்ட்டில் போலீசார் ஆஜர்படுத்தினர். அப்போது கனல் கண்ணனை ஒரு வாரம் காவலில் வைக்கும்படி கோர்ட்டு உத்தரவிட்டது.

இதனையடுத்து கனல் கண்ணனுக்கு மருத்துவ பரிசோதனைகளை முடித்துவிட்டு நேற்று அதிகாலை 1 மணி அளவில் அவரை போலீசார் பாளையங்கோட்டைக்கு அழைத்து சென்று சிறையில் அடைத்தனர். கனல் கண்ணன் கைது செய்யப்பட்டதைத் தொடர்ந்து நேற்று முன்தினம் இரவு முதல் நேற்று அதிகாலை வரை வடசேரி மற்றும் அண்ணா பஸ் நிலையத்தில் பலத்த போலீஸ் பாதுகாப்பு போடப்பட்டு இருந்தது.