நாகா்கோவில் வலம்புரிவிளை குப்பை கிடங்கில் தீ விபத்து

நாகர்கோவில்:

நாகர்கோவில் வலம்புரிவிளை குப்பை கிடங்கில் திடீரென தீப்பிடித்தது. இதனால் ஏற்பட்ட புகை மூட்டத்தால் பொதுமக்கள் அவதிக்குள்ளாகி உள்ளனர்.

தீ விபத்து

நாகர்கோவில் பீச் ரோட்டில் வலம்புரிவிளை குப்பை கிடங்கு உள்ளது. நாகர்கோவில் மாநகர பகுதியில் சேகரிக்கப்படும் குப்பைகள் இங்கு கொட்டப்பட்டு வருகிறது. இதனால் அந்த பகுதியில் குப்பைகள் மலைபோல் குவிந்து கிடக்கிறது.

இந்த குப்பை குவியலில் அடிக்கடி தீ விபத்து நடக்கும். இந்த நிலையில் நேற்று மாலை 4.30 மணியளவில் கிடங்கில் உள்ள குப்பை குவியலில் திடீரென தீ பிடித்து எரிய தொடங்கியது. இதை கண்ட பொதுமக்கள் நாகர்கோவில் தீயணைப்பு நிலையத்துக்கு தகவல் தெரிவித்தனர்.

அணைக்கும் பணி தீவிரம்

உடனே தீயணைப்பு வீரர்கள் சம்பவ இடத்திற்கு விரைந்து வந்து குப்பை கிடங்கில் எரிந்த தீயை அணைக்கும் முயற்சியில் ஈடுபட்டனர். ஆனால் காற்று வீசியதால் தீ மளமளவென மற்ற பகுதிகளுக்கு பரவியது. 2 தீயணைப்பு வண்டிகளில் தண்ணீரை பீய்ச்சி அடித்து தீயை அணைக்கும் பணியில் தீயணைப்பு வீரர்கள் தொடர்ந்து ஈடுபட்டு வருகிறார்கள்.

இந்த தீ விபத்தால் அப்பகுதி முழுவதும் புகை மண்டலமாக காட்சி அளித்தது. இந்த புகை மூட்டத்தால் வாகன ஓட்டிகள் மற்றும் பொதுமக்கள் அவதிக்குள்ளாகி உள்ளனர்.