தாமிரபரணி ஆற்றில் மூழ்கி மீன்பிடிக்கும் தொழிலாளி பலி

ஸ்ரீவைகுண்டம்:

ஸ்ரீவைகுண்டம் தெப்பகுளம் தெருவை சேர்ந்தவர் நல்லகண்ணு (வயது 57). மாற்றுத்திறனாளி. இவர் ஸ்ரீவைகுண்டம் தாமிரபரணி ஆற்றில் மீன் பிடித்து தொழில் செய்து வந்தார். வழக்கம்போல் நேற்று தாமிரபரணி ஆற்றில் மீன்பிடிக்க வலையை போட்டுவிட்டு திரும்பும்போது எதிர்பாராவிதமாக தண்ணீரில் மூழ்கிபலியானார். மீன்பிடிக்க ஆற்றுக்கு சென்றவர் நீண்டநேரமாக வீடு திரும்பாததால், குடும்பத்தினர் தீயணைப்பு துறையினருக்கு தகவல் தெரிவித்தனர். தீயணைப்புத்துறை நிலைய அலுவலர் இசக்கி தலைமையில் வீரர்கள் அவரது உடலை மீட்டனர். இதுகுறித்து ஸ்ரீவைகுண்டம் போலீசார் வழக்குப்பதிவு செய்து விசாரணை நடத்தி வருகின்றனர்.