விநாயகர் சதுர்த்தியை முன்னிட்டு பூக்கள் விலை உயர்வு

நெல்லை, தென்காசி மாவட்டத்தின் பல்வேறு பகுதியில் இருந்தும் பூக்கள் விற்பனைக்காக நெல்லை சந்திப்பு பூ மார்க்கெட்டிற்கு தினமும் வருகிறது. இங்கிருந்து வியாபாரிகளும், பொதுமக்களும் பூக்களை வாங்கி செல்வார்கள்.

வழக்கமான நாட்களை விட பண்டிகை மற்றும் திருவிழா நாட்களில் பூக்களின் விலை அதிகரித்து காணப்படும். அந்த வகையில் நாளை (திங்கட்கிழமை) விநாயகர் சதுர்த்தியை முன்னிட்டு நேற்று சந்திப்பு பூ மார்க்கெட்டில் பூக்களின் விலை அதிகரித்து காணப்பட்டது.

நேற்று முன்தினம் ஒரு கிலோ மல்லிகைப்பூ ரூ.800-க்கு விற்கப்பட்ட நிலையில் நேற்று ரூ.1000 அதிகரித்து ரூ.1800-க்கு விற்கப்பட்டது. பிச்சிப்பூ நேற்று முன்தினம் ரூ.650 நேற்று ரூ.1850 ஆக விற்பனை செய்யப்பட்டது.

அதேபோல் ரூ.200-க்கு விற்கப்பட்ட அரளிப்பூ ரூ.100 உயர்ந்து ரூ.300-க்கு விற்பனையானது. சம்பங்கி ரூ.450, கேந்தி ரூ.100-க்கும், ரோஜா ரூ.250-க்கும் விற்பனையானது. எனினும் பொதுமக்களும், வியாபாரிகளும் பூக்களை போட்டி போட்டு வாங்கி சென்றனர்.