கண்டமனூரில் மோட்டார் சைக்கிள் மோதி விவசாயி பலி

கண்டமனூரை சேர்ந்தவர் பால்ராஜ் (வயது 58). விவசாயி. இவர் நேற்று காலை தனது வீட்டில் இருந்து கண்டமனூர் பஸ் நிறுத்த பகுதிக்கு நடந்து சென்றார். தேனி சாலையில் வடக்கத்தியம்மன் கோவில் அருகே அவர் வந்தபோது, எதிரே வருசநாட்டை சேர்ந்த மாயசுதாகர் (35) என்பவர் ஓட்டிவந்த மோட்டார் சைக்கிள் எதிர்பாராதவிதமாக பால்ராஜ் மீது மோதியது.

இதில், தூக்கிவீசப்பட்ட அவர் படுகாயம் அடைந்தார். இதையடுத்து அவரை அக்கம்பக்கத்தினர் மீட்டு சிகிச்சைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர். ஆனால் மருத்துவமனைக்கு செல்லும் வழியிலேயே பால்ராஜ் பரிதாபமாக இறந்தார். இதுகுறித்து கண்டமனூர் போலீசார் வழக்குப்பதிவு செய்து விசாரணை நடத்தி வருகின்றனர்.