அடுக்குமாடி கட்டிடத்தில் இருந்து குதித்து ஒருவர் தற்கொலை

ஈரோடு பெரியார் நகர் வீட்டு வசதி வாரியத்தின் பழைய அடுக்குமாடி கட்டிடத்தில் இருந்து, 50 வயது மதிக்கத்தக்க ஒருவர் தற்கொலை செய்து கொள்ள முடிவு செய்து, கீழே குதித்து பலத்த காயத்துடன் நேற்று முன்தினம் உயிருக்கு போராடிக்கொண்டு இருந்தார். இதைப்பார்த்த அக்கம் பக்கத்தினர் இதுகுறித்து ஈரோடு டவுன் போலீசாருக்கு தகவல் கொடுத்தனர். அதன் பேரில் போலீசார் விரைந்து சென்று படுகாயம் அடைந்தவரை மீட்டு சிகிச்சைக்காக ஈரோடு அரசு ஆஸ்பத்திரிக்கு அனுப்பி வைத்தனர்.

அங்கு டாக்டர்கள் அவருக்கு தீவிர சிகிச்சை அளித்தனர். எனினும் சிகிச்சை பலனின்றி அவர் உயிரிழந்தார். அவர் யார்? எந்த ஊரை சேர்ந்தவர்? என்ற விவரம் தெரியவில்லை. இதுகுறித்து ஈரோடு டவுன் போலீசார் வழக்குப்பதிவு செய்து விசாரணை நடத்தி வருகின்றனர்.