ஆசிரியர் வீட்டின் பீரோவை உடைத்து 26 பவுன் நகைகள் ெகாள்ளை

ஒரத்தநாடு;

திருவோணம் அருகே ஆசிரியர் வீட்டின் பீரோவை உடைத்து 26 பவுன் நகைகளை கொள்ளையடித்துச்சென்ற மர்ம நபர்களை போலீசார் வலைவீசி தேடி வருகின்றனர்.

ஆசிரியர்

தஞ்சை மாவட்டம் திருவோணத்தை அடுத்துள்ள கா.உஞ்சியவிடுதி கிராமத்தை சேர்ந்தவர் அய்யாதுரை(வயது 42). தனியார் பள்ளி ஆசிரியர். இவருடைய மனைவி கடந்த 4 மாதங்களுக்கு முன்பும், இவரின் தந்தை கடந்த 2 மாதங்களுக்கு முன்பும் இறந்து விட்டனர்.இதனால் அய்யாத்துரை தனது மகன் மற்றும் மகளுடன் கடந்த 1 மாதமாக ஊரணிபுரத்தில் வாடகை வீட்டில் வசித்து வருகிறார். இருப்பினும் அய்யாத்துரை தினமும் கா.உஞ்சியவிடுதியில் உள்ள தனது சொந்த வீட்டுக்கு சென்று வருவது வழக்கம்.

26 பவுன் நகைகள் கொள்ளை

நேற்று முன்தினம் மாலை தனது வீட்டுக்கு சென்ற அய்யாத்துரை தான் வளர்த்து வரும் மாடுகளை பராமரித்துவிட்டு, இரவு ஊரணிபுரத்தில் உள்ள வாடகை வீட்டிற்கு திரும்பினார். நேற்று காலை வழக்கம்போல் அய்யாத்துரை தனது சொந்த வீட்டிற்கு சென்றார்.அப்போது வீட்டின் பின்பக்க கதவு உடைக்கப்பட்டு கிடந்தது. இதனால் அதிர்ச்சி அடைந்த அவர் வீட்டுக்குள் சென்று பார்த்தார். அப்போது வீட்டில் இருந்த பீரோ உடைக்கப்பட்டு அதில் இருந்த 26 பவுன் நகைகள் ெகாள்ளை போய் இருந்தது தெரிய வந்தது.

மர்ம நபர்களுக்கு வலைவீச்சு

இதுகுறித்து திருவோணம் போலீசாருக்கு அய்யாத்துரை தகவல் தெரிவித்தார். அதன்பேரில் சம்பவ இடத்துக்கு விரைந்து சென்ற போலீசார் கொள்ளை நடந்த வீட்டை பார்வையிட்டு தீவிர விசாரணை நடத்தினர். தஞ்சையில் இருந்து கைரேகை நிபுணர்களை வரவழைத்து தடயங்களை சேகரித்தனர். இதுகுறித்து திருவோணம் போலீசார் வழக்குப்பதிவு செய்து பீரோவை உடைத்து 26 பவுன் நகைகளை கொள்ளையடித்துச்சென்ற மர்ம நபர்களை வலைவீசி தேடி வருகின்றனர்.