போடியில் பெண்ணை கத்தியால் குத்திய கணவர் கைது

போடி திருமலாபுரம் முதல்வர் காலனியை சேர்ந்தவர் லட்சுமணன் (வயது 30). இவரது மனைவி சிவகாமி (29). இவர்களுக்கு ஒரு மகன், ஒரு மகள் உள்ளனர். இந்தநிலையில் சுயஉதவிக்குழுவில் வாங்கிய கடனை திரும்ப செலுத்துவது தொடர்பாக கணவன்-மனைவி இடையே அடிக்கடி தகராறு ஏற்பட்டு வந்ததாக கூறப்படுகிறது. இதற்கிடையே நேற்று முன்தினம் தம்பதிக்கு இடையே மீண்டும் தகராறு ஏற்பட்டது.

இதில் ஆத்திரமடைந்த லட்சுமணன் கத்தியால் தனது மனைவி சிவகாமியை குத்தினார். இதில் படுகாயம் அடைந்த அவரை அக்கம்பக்கத்தினர் மீட்டு சிகிச்சைக்காக போடி அரசு மருத்துவமனையில் சேர்த்தனர். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து போடி டவுன் போலீஸ் நிலையத்தில் சிவகாமி புகார் அளித்தார். அதன்பேரில் போலீசார் வழக்குப்பதிவு செய்து லட்சுமணனை கைது செய்தனர்.