மாநிலங்களவை எம்.பி.யாக நியமனம் பிரதமர் நரேந்திரமோடிக்கு இளையராஜா நன்றி

சென்னை,

இசையமைப்பாளர் இளையராஜாவை மாநிலங்களவை நியமன எம்.பியாக நியமித்து மத்திய அரசு அறிவிப்பு வெளியிட்டு உள்ளது. இதையடுத்து அவருக்கு அரசியல் தலைவர்கள், திரையுலகினர், ரசிகர்கள் வாழ்த்து தெரிவித்து வருகிறார்கள்.

இந்தநிலையில் இசை கச்சேரியில் பங்கேற்க அமெரிக்கா சென்றுள்ள இளையராஜா அங்கிருந்தபடி வாழ்த்து சொன்னவர்களுக்கு நெகிழ்ச்சியோடு நன்றி தெரிவித்து உள்ளார்.

பிரதமருக்கு நன்றி

இதுகுறித்து டுவிட்டரில் இளையராஜா வெளியிட்டுள்ள பதிவில் கூறியிருப்பதாவது:-

''என்மீது அன்பு கொண்ட ஏராளமான அபிமானிகள் இந்திய அரசு எனக்களித்த கவுரவமான அங்கீகாரத்திற்காக பாராட்டி வாழ்த்துகள் தெரிவித்த வண்ணம் இருக்கிறார்கள். உங்கள் அனைவருக்கும் தனித்தனியாக நன்றி சொல்ல இயலாதாகையால் எல்லோருக்கும் என் உளங்கனிந்த நன்றி" என்று கூறியுள்ளார்.

மற்றொரு பதிவில், ''பிரதமர் நரேந்திரமோடியின் எண்ணங்களுக்கு மனமார்ந்த நன்றியை தெரிவித்துக்கொள்கிறேன். இசை, கலை, கலாசாரத்தின் அழகை நமது சமூகத்தினரிடம் கொண்டு சேர்க்க கிடைத்துள்ள பெரிய வாய்ப்பாக இதனை கருதுகிறேன்.

இந்திய அரசு கொடுத்துள்ள இந்த அங்கீகாரம் இசை மற்றும் கலையை ஆர்வமாகவும், தொழிலாகவும் செய்ய இளைஞர்களை தூண்டுவதாக அமையும்" என்று கூறியுள்ளார்.

பாராட்டு விழா

எம்.பி.யாகி இசைக்கலைஞர்களுக்கு பெருமை சேர்த்துள்ள இளையராஜாவுக்கு பாராட்டு விழா நடத்தப்படும் என்று இசை கலைஞர்கள் சங்கத்தலைவர் தினா அறிவித்துள்ளார்.

வாழ்த்து

இதற்கிடையே இளையராஜாவுக்கு, த.மா.கா. தலைவர் ஜி.கே.வாசன், புதிய நீதிக்கட்சி நிறுவனர் ஏ.சி.சண்முகம், சசிகலா, முன்னாள் அமைச்சர் வைகை செல்வன், சமத்துவ மக்கள் கழக தலைவர் எர்ணாவூர் நாராயணன், பெருந்தலைவர் மக்கள் கட்சி தலைவர் என்.ஆர்.தனபாலன் உள்பட பலர் வாழ்த்து தெரிவித்துள்ளனர்.