ஈரோடு சந்தையில்மாடுகள் விலை உயர்வு

ஈரோடு கருங்கல்பாளையத்தில் மாட்டுச்சந்தை நேற்று கூடியது. ஈரோடு, சேலம், கரூர், நாமக்கல், திருச்சி, திண்டுக்கல், மதுரை, தேனி உள்ளிட்ட மாவட்டங்களில் இருந்து மாடுகள் விற்பனைக்காக கொண்டு வரப்பட்டன. இதில் 100 கன்றுக்குட்டிகள், 250 எருமை மாடுகள், 350 பசு மாடுகள் விற்பனைக்கு வந்தன. இதில் கன்றுக்குட்டிகள் ரூ.5 ஆயிரம் முதல் ரூ.20 ஆயிரம் வரையும், எருமை மாடு ஒன்று ரூ.30 ஆயிரம் முதல் ரூ.65 ஆயிரம் வரையும், பசு மாடு ஒன்று ரூ.30 ஆயிரம் முதல் ரூ.80 ஆயிரம் வரையும் விலைபோனது.

தமிழகம் மட்டுமின்றி கேரளா, ஆந்திரா, கர்நாடகா, தெலுங்கானா, கோவா, மராட்டியம் உள்பட பல்வேறு மாநிலங்களில் இருந்து வந்திருந்த வியாபாரிகள் மாடுகளை விலை பேசி பிடித்து சென்றார்கள். கடந்த வாரத்தை காட்டிலும், 100-க்கும் மேற்பட்ட மாடுகள் கூடுதலாக விற்பனைக்கு வந்தன. இதேபோல் மாடுகளின் விலையும் உயர்ந்து விற்பனையானதாக சந்தை நிர்வாகிகள் தெரிவித்தனர்.