பெரியகுளத்தில்மாயமான மூதாட்டி பிணமாக மீட்பு

கம்பத்தை சேர்ந்தவர் சின்னம்மாள் (வயது 83). இவர் அவரது மகன் கோபால் என்பவர் வீட்டில் வசித்து வந்தார். சின்னம்மாள் முதுகு வலியால் அவதியடைந்தார். இதற்காக மருத்துவ சிகிச்சை பெற்று வந்தார். இந்நிலையில் கடந்த 7-ந்தேதி இவர், கடைக்கு செல்வதாக வீட்டில் கூறிவிட்டு சென்றார். அதன்பின்னர் அவர் திரும்பி வரவில்லை. இதனால் அதிர்ச்சி அடைந்த அவரது மகன் கோபால் சின்னம்மாளை தேடி அலைந்தார். ஆனால் அவர் கிடைக்கவில்லை.

இதையடுத்து அவர் கம்பம் போலீசில் புகார் கொடுத்தார். அதன்பேரில் போலீசார் வழக்குப்பதிவு செய்து மாயமான சின்னம்மாளை தேடி வந்தனர். இந்நிலையில் பெரியகுளம் பாலசுப்பிரமணிய சுவாமி கோவில் ஆற்று படிக்கட்டில் சின்னம்மாள் இறந்து கிடப்பதாக தென்கரை போலீசாருக்கு தகவல் கிடைத்தது. அதன்பேரில் போலீசார் அங்கு சென்று சின்னம்மாள் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.