போடியில் சந்தன கட்டைகளை கடத்திய 2 பேர் கைது

போடி வழியாக சந்தன மர கட்டைகளை கடத்தி செல்வதாக வனத்துறையினருக்கு தகவல் கிடைத்தது. அதன்பேரில் போடி வனச்சரக அலுவலர் நாகராஜ், வனக் காப்பாளர் பெத்தனசாமி ஆகியோர் வாகன சோதனையில் ஈடுபட்டனர். நேற்று மாலை போடி-குரங்கணி சாலையில் ஐந்தரை மணி பாலம் அருகே வாகன சோதனை நடத்தினர். அப்போது மோட்டார் சைக்கிளில் 2 பேர் வந்தனர். அவர்களை சந்தேகத்தின்பேரில் பிடித்து சோதனை செய்தனர்.

அதில் அவர்களிடம் சந்தன கட்டைகள் இருந்தது. பின்னர் அதனை பறிமுதல் செய்த அதிகாரிகள் விசாரணை நடத்தினர். விசாரணையில் அவர்கள், போடி அருகே உள்ள அணைக்கரைப்பட்டி கிராமத்தைச் சேர்ந்த ராஜா (வயது 61), வினோபாஜி காலனியை சேர்ந்த சின்னன் (60) என்பதும், குரங்கணி வனப்பகுதியில் இருந்து சந்தன மரங்களை வெட்டி துண்டுகளாக்கி கடத்தி வந்ததும் தெரியவந்தது. இதையடுத்து 2 பேரையும் அதிகாரிகள் கைது செய்தனர்.