தூத்துக்குடியில் ஊர்க்காவல் படைக்கு ஆட்கள் தேர்வு

தூத்துக்குடி மாவட்ட ஊர்க்காவல் படைக்கு ஆட்கள் தேர்வு வருகிற 21-ந் தேதி நடக்கிறது.

இது குறித்து மாவட்ட போலீஸ் சூப்பிரண்டு பாலாஜி சரவணன் வெளியிட்டுள்ள செய்திக்குறிப்பில் கூறி இருப்பதாவது:-

ஊர்க்காவல்படை

தூத்துக்குடி மாவட்டத்தில் ஊர்க்காவல்படை வீரர்கள், போலீசுக்கு உதவியாக பல்வேறு பாதுகாப்பு பணிகளில் ஈடுபட்டு வருகின்றனர். இந்த நிலையில் மாவட்டத்தில் ஊர்க்காவல் படையில் காலியாக உள்ள 35 ஆண்கள், 6 பெண்கள் ஆக மொத்தம் 41 பணியிடங்களுக்கு ஊர்க்காவல் படை வீரர்கள் தேர்வு செய்யப்பட உள்ளனர். இதில் 10-ம் வகுப்பு தேர்ச்சி பெற்றவர்களாகவும், 18 வயது முதல் 45 வயதுக்குள் உள்ள, சேவை மனப்பான்மையுடன் தூத்துக்குடி மாவட்ட எல்லைக்குள் வசிப்பவராகவும் இருத்தல் வேண்டும். எந்தவித குற்ற பின்னணியும் இல்லாத ஆண்கள், மற்றும் பெண்கள் இந்த தேர்வில் கலந்து கொள்ளலாம்.

வருகிற 21-ந் தேதி

இந்த தேர்வு வருகிற 21-ந் தேதி காலை 9 மணி முதல் மதியம் 1 மணி வரை தூத்துக்குடி மாவட்ட போலீஸ் துறை அலுவலக கவாத்து மைதானத்தில் நடக்கிறது. இந்த தேர்வில் கலந்து கொள்ள வருபவர்கள் தங்கள் கல்வி, வயது நிரூபண அசல் மற்றும் நகல் சான்றிதழ்களுடன் வர வேண்டும்.

இவ்வாறு அவர் கூறி உள்ளார்.