தூத்துக்குடியில் தொழிலாளியிடம் பணம் கேட்டு மிரட்டியவர் கைது

தூத்துக்குடி வடபாகம் போலீஸ் இன்ஸ்பெக்டர் ரபிசுஜின்ஜோஸ் தலைமையில் போலீசார் ரோந்து பணியில் ஈடுபட்டு இருந்தனர். அப்போது, புதிய பஸ் நிலையம் அருகே சந்தேகப்படும்படியாக நின்று கொண்டு இருந்தவரை பிடித்து போலீசார் விசாரணை நடத்தினர். விசாரணையில், அவர் தூத்துக்குடி போல்டன்புரம் பகுதியை சேர்ந்த ஜெயக்குமார் மகன் ராஜாமணி (30) என்பதும், அவர் அந்த பகுதியில் வந்து கொண்டிருந்த தொழிலாளி ஒருவரை வழிமறித்து பணம் கேட்டு கத்தியை காட்டி கொலை மிரட்டல் விடுத்ததும் தெரியவந்தது.

உடனடியாக போலீசார் ராஜாமணியை கைது செய்தனர். இதுகுறித்து வடபாகம் போலீசார் வழக்குபதிவு செய்து விசாரணை மேற்கொண்டு வருகின்றனர். கைது செய்யப்பட்ட ராஜாமணி மீது ஏற்கனவே 13 வழக்குகள் நிலுவையில் உள்ளது குறிப்பிடத்தக்கது.