சம்பா தாளடி நெற்பயிர்களில் அதிகரிக்கும் புகையான் தாக்குதல்

மயிலாடுதுறையில் நேற்று 2-வது நாளாக கடும் பனிப்பொழிவு ஏற்பட்டதால் சம்பா தாளடி நெற்பயிர்களில் புகையான் தாக்குதல் அதிகரித்துள்ளது. இதனால் விவசாயிகள் கவலையில் உள்ளனர்.

2-வது நாளாக கடும் பனிப்பொழிவு

மயிலாடுதுறை மாவட்டம் மயிலாடுதுறை, தரங்கம்பாடி, குத்தாலம், சீர்காழி ஆகிய 4 தாலுகாக்களிலும் கடந்த வாரத்தில் கனமழை பெய்தது. இந்தநிலையில் மாவட்டத்தில் பல்வேறு பகுதிகளில் நேற்றுமுன்தினம் கடுமையாக பனிப்பொழிவு காணப்பட்டது. இதனைத்தொடர்ந்து நேற்று 2-வது நாளாக இரவில் அதிகமான குளிர் நிலவிவந்த நிலையில் அதிகாலையில் தொடங்கிய பனிப்பொழிவு காலை 8 மணியை தாண்டியும் நீடித்தது.

எதிரே வரும் வாகனங்கள் தெரியாத அளவிற்கு பனியின் தாக்கம் அதிகமாக காணப்பட்டதால் சாலையில் செல்லும் வாகனங்கள் முகப்பு விளக்கு எரிய விட்டபடியே சென்றனர்.

புகையான் தாக்குதல்

மேலும் நடைபயிற்சி மேற்கொள்வோர் அத்தியாவசிய பொருட்கள் வாங்க கடைவீதிக்கு செல்வோரின் எண்ணிக்கையும் குறைவாகவே காணப்பட்டது. பனியின் காரணமாக பொது மக்களின் இயல்பு வாழ்க்கை பெரிதும் பாதிக்கப்பட்டது.

மேலும் மழையில் சாய்ந்த சம்பா சாகுபடி தாளடி நெற்பயிர்கள் மற்றும் இளம் நெற்பயிர்களில் மழை, பனி என மாறி மாறி பெய்வதால் புகையான் தாக்குதல் அதிகரிக்கும் என விவசாயிகள் அச்சத்தில் உள்ளனர். நெற்பயிர்கள் காயாத நிலையில் அறுவடை செய்ய முடியாமல் விவசாயிகள் கவலை அடைந்துள்ளனர்.