கிராமப்புறங்களில்விளையாட்டு வீரர்களுக்கு உள்கட்டமைப்பு வசதிகளை முதல்-அமைச்சர் ஏற்படுத்த வேண்டும்மாநில கைப்பந்து கழக தலைவர் கவுதமசிகாமணி எம்.பி. கோரிக்கை

விக்கிரவாண்டி,

விழுப்புரம் மாவட்டம் விக்கிரவாண்டியில் உள்ள சூர்யா கல்லூரி வளாகத்தில் தமிழ்நாடு கைப்பந்து கழக மாநில பொதுக்குழு கூட்டம் நடைபெற்றது. இதற்கு மாநில தலைவர் கவுதம சிகாமணி எம்.பி. தலைமை தாங்கி பொதுக்குழு தீர்மானங்களை நிறைவேற்றி பேசினார்.

அப்போது அவர் பேசியதாவது:-

டாக்டர் பா.சிவந்தி ஆதித்தனாரின் ஈடுபாடு

தமிழக கைப்பந்து கழகம் பத்மஸ்ரீ டாக்டர் பா.சிவந்தி ஆதித்தனாரால் 50 ஆண்டுகாலமாக கட்டி காக்கப்பட்டது. அவரது காலத்தில் இந்திய அளவிலும் மட்டுமல்லாது உலக அளவிலும் தமிழக வீரர்கள் கைப்பந்து விளையாட்டில் பங்கேற்று தமிழகத்திற்கு பெருமை தேடி தந்துள்ளனர்.அதற்கு காரணம் பத்மஸ்ரீ டாக்டர் பா.சிவந்தி ஆதித்தனாரின் சிறந்த ஈடுபாடு ஆகும். அப்போது, தமிழகத்தில் உள்ள அனைத்து பகுதிகளிலும் சிறந்த விளையாட்டு வீரர்கள் உருவாக்கப்பட்டார்கள். அதன் மூலமாக அதிகமான ஏழை குடும்பத்தை சேர்ந்த விளையாட்டு வீரர்கள் அரசு பணியில் வேலை வாய்ப்பு பெற்றார்கள்.

விளையாட்டு மைதானம்

தமிழகத்தில் தற்போது, விளையாட்டு துறை அமைச்சராக பொறுப்பேற்றுள்ள உதயநிதி ஸ்டாலினுக்கு மாநில பொதுக்குழு சார்பில் பாராட்டுகளை தெரிவித்துக்கொள்கிறோம். அவர் 234 தொகுதியிலும் விளையாட்டு மைதானம் அமைத்து தருவதாக உறுதி கூறியுள்ளார்.

இதில், முதலாவதாக தென்காசி மாவட்டத்தில் விளையாட்டு மைதானம் கட்டி தர வேண்டும் என்கிற கேரிக்கையை அமைச்சரிடம் முன்வைப்போம். கிராமபுறங்களில் சிறந்த விளையாட்டு வீரர்கள் உள்ளனர். அவர்களை ஊக்குவிக்கும் வகையில் கிராமபுறங்களில் விளையாட்டு வீரர்களுக்கு விளையாட உள் கட்டமைப்பு வசதிகளை ஏற்படுத்தி தர முன்வரவேண்டுமென தமிழக முதல்-அமைச்சர் மு.க.ஸ்டாலினுக்கும் மாநில கைப்பந்து கழகம் சார்பில் கோரிக்கை வைக்கிறோம். மேலும் விளையாட்டு போட்டிகள் நடைபெறும் சமயங்களில் போலீஸ் அனுமதி வேண்டாம் என்பதை அமைச்சரிடம் கூறி தீர்வு காணப்படும்.

இவ்வாறு அவர் பேசினார்.

முன்னதாக மாவட்ட வாலிபால் கழக செயலாளர் மணி வரவேற்றார். மாநில பொதுச்செயலாளர் மார்ட்டின் சுதாகர், மாநில பொருளாளர் செல்வகணேஷ், வாழ்நாள் தலைவர் அர்ஜூன் துரை ஆகியோர் வாழ்த்துரை வழங்கினார்கள் கூட்டத்தில் புகழேந்தி எம்.எல்.ஏ. மாவட்ட ஊராட்சி குழு தலைவைர் ஜெயச்சந்திரன், முன்னாள் எம்.எல்.ஏ. புஷ்பராஜ், முன்னாள் நகரமன்ற தலைவர் ஜனகராசு மற்றும் தமிழகத்தின் அனைத்து மாவட்டங்களிலிருந்து கைப்பந்து கழக நிர்வாகிகள், பயிற்சியாளர்கள், விளையாட்டு வீரர்கள் கலந்து கொண்டார்கள்.