விவசாயிகளுக்கு ஒருங்கிணைந்த பயிர் மேலாண்மை பயிற்சி

சீர்காழி:

சீர்காழி அருகே விளந்திட சமுத்திரம் ஊராட்சியில் இந்திய நெல் ஆராய்ச்சி நிறுவனம், தமிழ்நாடு அரசு வேளாண்மை உழவர் நலத்துறை, பண்டித ஜவஹர்லால் நேரு வேளாண் கல்லூரி மற்றும் ஆராய்ச்சி நிலையம் சார்பில் நெற்பயிரில் அதிக மகசூல் பெற ஆதிதிராவிடர் விவசாயிகளுக்கான ஒருங்கிணைந்த பயிர் மேலாண்மை பயிற்சி முகாம் நடந்தது. முகாமிற்கு வேளாண்மை கல்லூரி முதல்வர் புஷ்பராஜ் தலைமை தாங்கினார். மாவட்ட வேளாண்மை இணை இயக்குனர் சேகர் முன்னிலை வகித்தார். வேளாண்மை கல்லூரி பேராசிரியர் சாமிநாதன் வரவேற்றார். முகாமில் இந்திய நெல் ஆராய்ச்சி நிறுவன இயக்குனர் சுந்தரம், வேளாண் கல்லூரி பேராசிரியர் மோகன், வேளாண்மை கல்லூரி பூச்சிகள் துறை பேராசிரியர் கான்டீபன் ஆகியோர் கலந்து கொண்டு நெல் சாகுபடியில் அதிக மகசூல் பெறுவது குறித்து பேசினர். தொடர்ந்து ஒன்றிய குழு துணை தலைவர் உஷா நந்தினி பிரபாகரன், ஊராட்சி மன்ற தலைவர் ரமணி ராஜ் ஆகியோர் 50 ஆதிதிராவிடர் விவசாயிகளுக்கு மின்கலன் தெளிப்பான், தார்ப்பாய், நானோ யூரியா, பாஸ்பேட், யூரியா, அசோஸ்பைரில்லம், ஜிங் சல்பேட் கொண்ட தொகுப்பினை வழங்கினர். முடிவில் வேளாண் கல்லூரி பேராசிரியர் பார்த்தசாரதி நன்றி கூறினார்.