தூத்துக்குடியில் ரூ.28 கோடியில் கட்டப்படும் அறிவியல் பூங்கா பணிகள் ஒருமாதத்தில் முடிவடையும்:மேயர் ஜெகன் பெரியசாமி

அறிவியல் பூங்கா

பசுமை தூத்துக்குடி என்ற திட்டத்தின் கீழ் ஆக்கிரமிப்பு செய்யப்பட்ட மாநகராட்சி இடங்கள் மீட்கப்பட்டு அந்த இடங்களில் பூங்காக்கள், மரக்கன்று நடுதல் போன்ற பணிகள் நடைபெற்று வருகிறது. அதன் ஒரு பகுதியாக கடந்த பல ஆண்டுகளாக குளம் போன்று காட்சியளித்த, அம்பேத்கர ்நகரில் உள்ள 8 ஏக்கர் நிலத்தில் ரூ.28 கோடி மதிப்பில் நவீன வசதியுடன் கூடிய அறிவியல் தொழில்நுட்பம், பொறியியல் மற்றும் கணித பூங்காவான 'ஸ்டெம் பார்க்' கட்டப்பட்டு வருகிறது. அந்தப் பணிகளை மாநகராட்சி மேயர் ஜெகன்பெரியசாமி பார்வையிட்டு ஆய்வு செய்தார்.

பின்னர் அவர் கூறுகையில்,

டிஜிட்டல் மினி திரையரங்குகள்

தூத்துக்குடி அம்பேத்கர் நகரில் பள்ளி, கல்லூரி மாணவ-மாணவிகளின் அறிவியல் திறனை வளர்க்கும் வகையில் பிரம்மாண்டமான ஸ்டெம் பார்க் அமைக்கும் பணி நடந்து வருகிறது. இந்த பூங்கா அறிவியல் தொழில்நுட்பம், பொறியியல் மற்றும் கணிதம் தொடர்பான பொழுதுபோக்கு அம்சங்களுடன் கட்டப்பட்டு வருகிறது. இதில் கூட்ட அரங்கு, கோளரங்கம் உள்ளிட்ட பல்வேறு வசதிகள் இடம்பெறும். மேலும் பூங்காவில் மனிதனின் பரிணாம வளர்ச்சி, ஸ்ரீஹரிகோட்டாவில் உள்ள ராக்கெட் ஏவுதல மாதிரி, டைனோசர் உள்ளிட்ட பல்வேறு விலங்குகளின் உருவங்கள், புவி வெப்பமாதல் உள்ளிட்ட பாதிப்புகளை விளக்கும் டிஜிட்டல் அரங்குகள், மாணவர்களுக்கு திரை காட்சிகள் மூலம் அறிவியல் குறித்து அறிவை வளர்ப்பதற்கான நவீன டிஜிட்டல் மினி திரையரங்குகள் உள்ளிட்டவை அமைக்கப்பட்டு உள்ளன.

ஒரு மாதத்தில்...

கோவைக்கு அடுத்து தூத்துக்குடியில் தான் இதுபோன்ற வசதியுடன் ஸ்டெம் பார்க் அமைக்கப்படுகிறது. இந்த பூங்காவை பொதுமக்கள் நல்ல முறையில் பாதுகாத்துக ்கொள்ள வேண்டும். இன்னும் ஒரு மாதத்தில் பணிகள் நிறைவடையும்' என்று கூறினார்.

இதில் மாநகராட்சி கவுன்சிலர்கள் மற்றும் தி.மு.க. கட்சி பிரமுகர்கள் கலந்து கொண்டனர்.