மின்வாரிய ஊழியர் வீட்டில் நகை-பணம் கொள்ளை

தூத்துக்குடியில் மின்வாரிய ஊழியர் வீட்டில் நகை-பணத்தை மர்மநபர்கள் கொள்ளையடித்துச் சென்றனர்.

மின்வாரிய ஊழியர்

தூத்துக்குடி- எட்டயபுரம் சாலையில் உள்ள தமிழ்நாடு அரசு ஊழியர் காலனியைச் சேர்ந்தவர் மனவாளன் (வயது 45). இவர் தூத்துக்குடி மின்வாரிய அலுவலகத்தில் ஊழியர் வேலை பார்த்து வருகிறார்.

இவரது மனைவி பொன்செல்வி. இவர் தனியார் வங்கியில் பணி செய்து வருகிறார். இவர்கள் வேலைக்கு சென்ற பின் இவர்களின் 2 மகன்களும் பள்ளிக்கு சென்று விட்டனர்.

நகை-பணம் கொள்ளை

இந்த நிலையில் நேற்று முன்தினம் மாலை மனவாளன் வீட்டுக்கு திரும்பி வந்தார். அப்போது, வீட்டின் கதவு உடைக்கப்பட்டு இருந்தது. இதை கண்டு அதிர்ச்சி அடைந்த அவர் உள்ளே சென்று பார்த்த போது பீரோ உடைக்கப்பட்டு கிடந்தது. மேலும் அதில் இருந்த 9¾ பவுன் தங்க நகைகள், ரூ.10 ஆயிரம் மற்றும் ஒரு செல்போன் ஆகியவை கொள்ளை போயிருந்தது தெரியவந்தது.

இந்த சம்பவம் குறித்து மனவாளன் தூத்துக்குடி சிப்காட் போலீஸ் நிலையத்தில் புகார் அளித்தார். அதன்பேரில் போலீசார் வழக்குப்பதிவு செய்தனர். வீட்டில் ஆட்கள் இல்லாததை நோட்டமிட்ட மர்மநபர்கள் இந்த கொள்ளை சம்பவத்தில் ஈடுபட்டது தெரியவந்தது. இதுதொடர்பாக போலீசார் தீவிர விசாரணை நடத்தி மர்ம நபர்களை போலீசார் வலைவீசி தேடிவருகிறார்கள்.