தர்மபுரியில் நாளை தனியார் துறை வேலைவாய்ப்பு முகாம்

தர்மபுரி:

தர்மபுரியில் நாளை தனியார் துறை வேலைவாய்ப்பு முகாம் நடக்கிறது.

இதுதொடர்பாக தர்மபுரி மாவட்ட கலெக்டர் சாந்தி வெளியிட்டுள்ள செய்திக்குறிப்பில் கூறப்பட்டுள்ளதாவது:-

வேலைவாய்ப்பு முகாம்

தனியார் துறை நிறுவனங்களும், தனியார் துறையில் பணிபுரிய விருப்பமுள்ள இளைஞர்களும் பங்கேற்கும் வேலைவாய்ப்பு முகாம் தர்மபுரி மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் நாளை (வெள்ளிக்கிழமை) காலை 10 மணிக்கு நடைபெற உள்ளது. இந்த முகாமில் பல்வேறு தனியார் நிறுவனங்கள் கலந்து கொண்டு விற்பனையாளர்கள், மார்க்கெட்டிங் எக்சிகியூட்டிவ், மேற்பார்வையாளர்கள், மேலாளர்கள், கணினி ஆபரேட்டர்கள், தட்டச்சர்கள், அக்கவுண்டன்ட், கேசியர், மெக்கானிக் உள்ளிட்ட பல்வேறு பணிகளுக்கு தகுதியான நபர்களை தேர்வு செய்ய உள்ளனர்.

கல்வித்தகுதி

பள்ளி, டிப்ளமோ, பட்டப்படிப்பு என அனைத்துவித கல்வித்தகுதி பெற்றவர்களும் இந்த வேலைவாய்ப்பு முகாமில் கலந்து கொள்ளலாம். இந்த முகாம் மூலம் தனியார் துறையில் வேலைவாய்ப்பு பெறுபவர்களுக்கு, அவர்களுடைய வேலைவாய்ப்பு பதிவு ரத்து செய்யப்பட மாட்டாது.

அரசு துறைகளில் அவர்களது பதிவு மூப்பின்படி நேர்முக தேர்வுக்கு அழைப்பு அனுப்பப்படும். எனவே தகுதியும் விருப்பமும் உள்ள அனைவரும் இந்த வேலைவாய்ப்பு முகாமில் கலந்து கொண்டு பயன்பெறுமாறு கேட்டு கொள்ளப்படுகிறார்கள்.

இவ்வாறு அதில் கூறப்பட்டுள்ளது.