6 பேர் விடுதலையும், மக்கள் மனநிலையும்... சட்ட வல்லுனர்கள்-பாதிக்கப்பட்டவர்கள் கருத்து

கிருஷ்ணகிரி:

1991-ம் ஆண்டு மே மாதம் 21-ந் தேதி முன்னாள் பிரதமர் ராஜீவ்காந்தி கொலை செய்யப்பட்டார். தமிழகத்திற்கு தேர்தல் பிரசாரம் செய்யவந்த இடத்தில், ஸ்ரீபெரும்புதூரில் வைத்து மனிதவெடிகுண்டு தாக்குதலில் அந்தத் துயரச் சம்பவம் அரங்கேற்றப்பட்டது.

உலகை உலுக்கிய அந்தக் கொலையில் மனித வெடிகுண்டாக செயல்பட்ட தாணு என்ற பெண் உடல் சிதறிப் பலியானார். முக்கிய குற்றவாளியான ஒற்றைக்கண் சிவராசன் சைனைடு தின்று தற்கொலை செய்துகொண்டார்.

தூக்குத்தண்டனை

*இந்த வழக்கில் 41 பேர் மீது குற்றம் சாட்டப்பட்டது. விடுதலைப்புலி தலைவர் பிரபாகரன், பொட்டு அம்மன், அகிலா ஆகிய 3 பேர் தலைமறைவு குற்றவாளிகளாக அறிவிக்கப்பட்டனர். 12 பேர் தற்கொலை செய்துகொண்டனர். மீதமுள்ள 26 பேர் கைது செய்யப்பட்டு சிறையில் அடைக்கப்பட்டனர்.

*1998-ம் ஆண்டு ஜனவரி மாதம் 28-ந் தேதி பூந்தமல்லி சிறப்பு நீதிமன்றம் 26 பேருக்கும் தூக்குத்தண்டனை விதித்தது. அனைவரும் மேல் முறையீடு செய்தனர்.

*1999-ம் ஆண்டு மே மாதம் 5-ந் தேதி அதில் தீர்ப்பு வழங்கப்பட்டது. 26 பேர்களில் நளினி, சாந்தன், முருகன், பேரறிவாளன் ஆகிய 4 பேருக்கு தூக்குத்தண்டனை உறுதிசெய்யப்பட்டது. ராபர்ட்பயாஸ், ஜெயகுமார், ரவிச்சந்திரன் ஆகிய 3 பேருக்கு தூக்குத்தண்டனை ஆயுள்தண்டனையாகக் குறைக்கப்பட்டது. சண்முகவேலு என்பவர் விடுவிக்கப்பட்டார். அதுபோல் மீதம் உள்ள 18 பேரும் சிறையில் இருந்த காலத்தை தண்டனை காலமாகக் கருதி விடுவிக்கப்பட்டனர்.

எஞ்சிய 7 பேர்

தூக்குத்தண்டனை பெற்ற நளினி, சாந்தன், முருகன், பேரறிவாளன், ஆயுள்தண்டனை பெற்ற ராபர்ட்பயாஸ், ஜெயகுமார், ரவிச்சந்திரன் ஆகிய 7 பேரும் விடுதலை பெறுவதற்காக சட்டப் போராட்டங்களில் ஈடுபட்டு வந்தனர்.

*2000-ம் ஆண்டு ஏப்ரல் மாதம் 24-ந் தேதி நளினியின் தூக்குத்தண்டனையை ஆயுள் தண்டனையாகக் குறைக்கப்பட்டது.

பேரறிவாளன், சாந்தன், முருகன் ஆகிய 3 பேரும் ஜனாதிபதியிடம் கருணை மனு செய்து இருந்தார்கள். அந்த மனுக்கள் கிடப்பில் போடப்பட்டன.

கருணை மனுக்கள் காரணம் இல்லாமல் நிலுவையில் இருந்ததால் 2014-ம் ஆண்டு பிப்ரவரி 19-ந் தேதி அவர்களின் மரணதண்டனையை நீதிமன்றம் ரத்துசெய்தது.

2022-ம் ஆண்டு மே மாதம் 18-ந்தேதி பேரறிவாளன் விடுதலை செய்யப்பட்டார்.

30 ஆண்டுகள் சிறை, சிறையில் நன்னடத்தை, கருணை மனு மீது முடிவு எடுக்காமல் காலம் தாழ்த்தி வருவது போன்றவற்றை காரணம் காட்டி, அரசியல் சாசனம் நீதிமன்றத்துக்கு வழங்கிய சிறப்பு அதிகாரம் 142-வது பிரிவைப் பயன்படுத்தி அவரை விடுதலை செய்தது.

விடுதலை

பேரறிவாளன் விடுதலையை அடிப்படையாக வைத்து, நளினி, முருகன், சாந்தன், ரவிச்சந்திரன், ஜெயகுமார், ராபர்ட்பயாஸ் ஆகிய 6 பேரும் தங்களை விடுதலை செய்யுமாறு சுப்ரீம்கோர்ட்டில் முறையிட்டு இருந்தனர்.

அவர்களின் முறையீட்டை ஏற்றுக்கொண்ட சுப்ரீம் கோர்ட்டு, 6 பேரையும் நேற்று அதிரடியாக விடுதலை செய்தது.

அவர்களின் விடுதலை குறித்து பொதுமக்களும், சட்ட வல்லுனர்களும் பாதிக்கப்பட்டவர்களும் கருத்துத் தெரிவித்து இருக்கிறார்கள்.

தயங்கியது ஏன்?

ஐகோர்ட்டு வக்கீல் தமிழ்மணி:-

நளினி, பேரறிவாளன் உள்ளிட்ட 7 பேரை விடுவிக்கலாம் என அமைச்சரவை முடிவெடுத்த பின்பு அதை கவர்னர் மறுக்கவோ அல்லது எந்தவித முடிவும் எடுக்காமலோ இருக்க முடியாது என்பதை பேரறிவாளனை விடுவித்த போதே சுப்ரீம் கோர்ட்டு தெளிவாக கூறிவிட்டது. பேரறிவாளனை விடுவித்து சுப்ரீம் கோர்ட்டு தீர்ப்பு கூறியதும் மற்ற 6 பேரையும் ஒரு அரசாணை மூலம் தமிழக அரசு விடுவித்து இருக்க முடியும். ஆனாலும், தமிழக அரசு அதில் உரிய முடிவெடுக்க தயங்கியது ஏன்? என தெரியவில்லை. நன்னடத்தை மற்றும் கருணை அடிப்படையில் இவர்கள் விடுவிக்கப்பட வேண்டியவர்கள்தான். அதை சுப்ரீம் கோர்ட்டு உறுதி செய்திருப்பது 100 சதவீதம் வரவேற்கத்தக்கது.

வரையறை கொண்டுவரப்பட வேண்டும்

ஐகோர்ட்டு வக்கீல் திருமுருகன்:-

தமிழக அமைச்சரவை தீர்மானத்தின் மீது கவர்னர் விரைந்து முடிவெடுத்திருந்தால் நளினி உள்ளிட்டோர் விடுதலையில் இவ்வளவு காலதாமதம் ஏற்பட்டிருக்காது. 1981-ம் ஆண்டு மாருராம் வழக்கில் சுப்ரீம் கோர்ட்டு நீதிபதி கிருஷ்ணய்யர், கவர்னர் விரும்புகிறாரோ இல்லையோ மாநில அமைச்சரவையின் தீர்மானத்தை ஏற்று நடக்க கடமைப்பட்டவர் என்றும், அமைச்சரவை தீர்மானத்தின் மீது கவர்னரிடம் கையெழுத்து பெறுவது என்பது ஒரு சம்பிரதாய நடவடிக்கை மட்டுமே என்றும் தீர்ப்பு கூறி உள்ளார். இந்த தீர்ப்புகளை எல்லாம் சுட்டிக்காட்டிய போதும் அமைச்சரவை தீர்மானத்தின் மீது கவர்னர் முடிவெடுக்க தாமதப்படுத்தி வந்ததன் விளைவு நளினி, ரவிச்சந்திரன் உள்ளிட்டோர் அமைச்சரவை தீர்மானத்துக்கு பின்பும் பல ஆண்டுகள் சிறையில் இருக்க வேண்டிய நிலைக்கு தள்ளப்பட்டனர். இதுபோன்ற செயல் மாநிலங்களின் உள்ளார்ந்த அதிகாரத்தில் பாதிப்பை ஏற்படுத்தும் வகையில் உள்ளது. இதுபோன்ற சட்ட சிக்கல்கள் பல்வேறு மாநிலங்களில் உள்ளது. எனவே, அமைச்சரவை தீர்மானம் உள்ளிட்ட பல்வேறு விவகாரங்களில் குறிப்பிட்ட நாட்களுக்குள் கவர்னர் உரிய முடிவெடுக்க வேண்டும் என்ற சட்ட வரையறை கொண்டு வரப்பட வேண்டும்.

ராஜகுருவின் மனைவி

குண்டுவெடிப்பில் பலியான இன்ஸ்பெக்டர் ராஜகுருவின் மனைவி பாலசரஸ்வதி:-

எல்லோரும் ராஜீவ்காந்தி கொலையாளிகள் விடுதலையை கொண்டாடுகிறார்கள் அந்த நாளில் இளம் வயது போலீஸ் அதிகாரியாக இருந்த என் கணவர், என்னையும், எனது மகன், மகளையும் சிறுவயதிலேயே தவிக்கவிட்டு காலமாகி விட்டார். என்னை போன்று இன்னும் பலர் குடும்பங்களை இழந்து தவிர்க்கிறார்கள். பலர் காயம் அடைந்துள்னர். காவல்துறையில் மிகச்சிறப்பாக பணியாற்றி எல்லோரது பாராட்டையும் பெற்ற என் கணவர், உயிரோடு இருந்திருந்தால் உயர் பதவியை அலங்கரித்திருப்பார். அவரது மரணம் காவல்துறைக்கு இழப்பு. என்னுடைய குடும்பத்துக்கும் பேரிழப்பு. பாதிக்கப்பட்ட எங்களை பற்றி யார் கவலைப்படுகிறார்கள்?.

இந்த கொலைக்கு காரணமாக இருந்தவர்களை வரவேற்று அறிக்கை தருகிறவர்கள், ராஜீவ்காந்தியோடு சேர்ந்து இறந்து போன 16 பேரில் ஒருவருக்காவது ஒரு சொட்டு கண்ணீர் விட்டது உண்டா?. பாதிக்கப்பட்ட என்னை போன்ற குடும்பத்தினருக்கு இந்த சமுதாயம் என்ன பதில் சொல்லப்போகிறது?.

டி.எஸ்.பி. அனுசுயா

குண்டுவெடிப்பில் காயமடைந்த ஓய்வுபெற்ற டி.எஸ்.பி. அனுசுயா:-

இப்போதும் எனது உடலில் பல இடங்களில் குண்டு புகுந்த காயம் இருக்கிறது. இந்த வேதனையில் இருந்து பாதிக்கப்பட்டவர்கள் தற்போது வரை மீளவில்லை. பலரது வாழ்க்கை சீரழிந்து போனது. நாங்கள் தினம் தினம் வேதனையால் துடித்து கொண்டிருக்கும் போது கொலையாளிகள் விடுதலையை பலர் கொண்டாடுகிறார்கள். எங்கள் வலியையும் வேதனையையும் யாரும் மதிப்பதில்லை.

தாமதமான தீர்ப்பு

கிருஷ்ணகிரியை சேர்ந்த மூத்த வக்கீல்ஜி.டி.கருணாகரன்:-

முன்னாள் பிரதமர் ராஜீவ்காந்தி கொலை வழக்கு தொடர்பாக வழங்கப்பட்டுள்ள தீர்ப்பு வரவேற்ககூடியது. இந்த தீர்ப்பு தாமதமான தீர்ப்பு ஆகும். 30 ஆண்டுகளாக நடந்து வந்து இன்றைய தினம் (நேற்று) தீர்ப்பு கூறப்பட்டுள்ளது. காலம் தாழ்த்தி வழங்கப்படும் தீர்ப்பு, மறுக்கப்பட்ட நீதிக்கு சமம் ஆகும். இந்த வழக்கில் சட்ட வல்லுனர்களை கலந்தாலோசித்து விரைவாக தீர்ப்பு வழங்கி இருக்கலாம். இதே போல சாமானிய மக்களுக்கு தீர்ப்பு கிடைத்தால் அவர்களின் நிலை என்னவாகும். விஞ்ஞானம், அறிவியல் ரீதியாக நமது நாடு முன்னேறி உள்ளது.

நீதித்துறையிலும் காலத்திற்கேற்ப விரைவாக வழக்குகள் முடிக்கப்பட வேண்டும். ராஜீவ்காந்தி கொலை வழக்கில் குற்றம் சாட்டப்பட்டவர்கள் 30 ஆண்டுகளாக சிறையில் இருந்துள்ளனர். தற்போது அவர்களின் நன்னடத்தை, உடல் நலம், 30 ஆண்டுகளுக்கும் மேலாக அவர்களின் சிறைவாசம் இவற்றை கருதி இந்த வழக்கில் அவர்கள் விடுதலை செய்யப்பட்டுள்ளனர். அவர்களுக்கு நீதி கிடைத்துள்ளது.

வரவேற்கிறேன்

தேன்கனிக்கோட்டையை சேர்ந்த சமூகஆர்வலர் மணிவண்ணன்:-

30 ஆண்டுகளுக்கு முன்பு நடந்த ராஜீவ்காந்தி கொலை வழக்கில் குற்றம் சாட்டப்பட்டவர்கள் தற்போது விடுதலை செய்யப்பட்டுள்ளனர். இந்த தீர்ப்பு வரவேற்க கூடியது. இந்த 30 ஆண்டு காலமாக சிறையில் அவர்கள் சொல்லொண்ணா துயரத்தை அனுபவித்து உள்ளனர். மனிதாபிமான அடிப்படையில் இந்த தீர்ப்பை வரவேற்கிறேன்.

ஒரு மனிதனின் ஆயுள் காலத்தில் பாதி காலத்தை சிறையில் அனுபவிப்பது என்பது கொடுமையான விஷயம். அதை அவர்கள் அனுபவித்துள்ளனர். ராஜீவ்காந்தி கொலை தொடர்பாக சோனியா காந்தி, அவரது மகன் ராகுல்காந்தி ஆகியோர் அவர்களை மன்னித்து விட்ட நிலையில், அவர்களை ஏற்கனவே விடுதலை செய்திருக்க வேண்டும். இந்த தீர்ப்பை சாமானியன் என்ற முறையில் நான் வரவேற்கிறேன்.

நாட்டை உலுக்கிய சம்பவம்

காவேரிப்பட்டணம் அருகே உள்ள பனகமுட்லுவை சேர்ந்த சரோஜா:-

முன்னாள் பிரதமர் ராஜீவ்காந்தி மனித வெடிகுண்டால் கொலை செய்யப்பட்டார். அவருடன் 16 பேர் குண்டு வெடிப்பில் பலியானார்கள். நாட்டையே உலுக்கிய இந்த சம்பவத்தில், தொடர்புடையவர்கள் விடுதலை செய்யப்பட்டுள்ளனர். இந்த தீர்ப்பு வரவேற்க கூடிய தீர்ப்பல்ல. அந்த குண்டு வெடிப்பால் உயிர் இழந்தவர்கள், உடல் உறுப்புகளை இழந்தவர்கள் ஏராளம். தமிழகத்தில் கடந்த 1991-ல் நடந்த அந்த சம்பவத்தை இன்றளவும் மக்கள் மறக்க மாட்டார்கள். சட்டம் எல்லோருக்கும் பொதுவானது தான். ஆகவே ராஜீவ்காந்தி கொலையில் தொடர்புடையவர்களை விடுதலை செய்தது ஏற்று கொள்ள கூடிய தீர்ப்பல்ல. இவ்வாறு அவர்கள் கூறினர்.