கலைஞர் கோட்டம் ஜூன் 15-ந் தேதி திறக்கப்படும்- அமைச்சர் எ.வ.வேலு

திருவாரூர் அருகே காட்டூரில் கட்டப்பட்டுள்ள கலைஞர் கோட்டம் ஜூன் 15-ந் தேதி திறக்கப்படும் என அமைச்சர் எ.வ.வேலு கூறினார்.

ஆய்வுக்கூட்டம்

திருவாரூர் மாவட்ட கலெக்டர் அலுவலகத்தில் சாலை பாதுகாப்பு குறித்த ஆய்வுக்கூட்டம் நடந்தது. கூட்டத்தில் அமைச்சர்கள் எ.வ.வேலு, இ.பெரியசாமி, டி.ஆர்.பி.ராஜா ஆகியோர் கலந்து கொண்டனர். கூட்டத்தை தொடர்ந்து அமைச்சர் எ.வ.வேலு நிருபர்களுக்கு அளித்த பேட்டியில் கூறியதாவது:-

திருவாரூர் மாவட்டத்தில் கடந்த ஆண்டில் 123 கிலோ மீட்டர் தூர சாலைகள் ரூ.128 கோடி மதிப்பீட்டிலும், இந்த ஆண்டில் 71 கிலோ மீட்டர் தூர சாலைகள் ரூ.90 கோடி மதிப்பீட்டிலும் அமைக்கப்பட்டுள்ளன. நபார்டு உதவியுடன் ரூ.24.50 கோடியில் 11 பாலப்பணிகள் தொடங்கப்பட்டு 7 பணிகள் நிறைவு பெற்றுள்ளன.

நீடாமங்கலம் ரெயில்வே மேம்பாலம்

நாகை-மைசூர் நெடுஞ்சாலையில் உள்ள நீடாமங்கலத்தில் ரெயில்வே மேம்பாலம் கட்ட நில எடுப்பு பணிகள் நடத்தப்பட்டு ரூ.170 கோடி மதிப்பீட்டில் இந்த ஆண்டிலேயே ஒப்பந்தம் கோரப்பட்டு, பணிகள் தொடங்கப்பட உள்ளன.

மயிலாடுதுறை-திருவாரூர் சாலை பேரளம் பகுதியில் ரூ.44 கோடியில் ரெயில்வே மேம்பாலம் ரூ.39 கோடியில் கட்டப்பட உள்ளது. சென்னை-கன்னியாகுமரி தொழில் வழித்தடம் திட்டத்தின் கீழ் தஞ்சை-மன்னார்குடி, கும்பகோணம்-மன்னார்குடி, மயிலாடுதுறை-திருவாரூர் ஆகிய 3 சாலை பணிகளுக்கும் முக்கியத்துவம் கொடுத்து பணிகள் நடந்து வருகின்றன.

நாகை-தஞ்சை இடையே 65 கிலோ மீட்டர் தூர சாலை பணிகள் ரூ.283 கோடி திட்ட மதிப்பீட்டில் நடந்து வருகிறது.

கலைஞர் கோட்டம்

அடுத்த மாதம்(ஜூன்) 3-ந் தேதி(சனிக்கிழமை) சென்னையில் முன்னாள் முதல்-அமைச்சர் கருணாநிதி நூற்றாண்டு விழா கொண்டாடப்பட உள்ளது. அதைத்தொடர்ந்து 5-ந் தேதி(திங்கட்கிழமை) நடைபெறும் விழாவில் ஜனாதிபதி திரவுபதி முர்மு கலந்து கொண்டு கிண்டியில் ரூ.230 கோடியில் கட்டப்பட்டுள்ள 1,000 படுக்கைகள் கொண்ட பல்நோக்கு ஆஸ்பத்திரியை திறந்து வைக்கிறார்.

திருவாரூர் காட்டூர் பகுதியில் கட்டப்பட்டுள்ள கலைஞர் கோட்டத்தை முதல்-அமைச்சர் மு.க.ஸ்டாலின் தலைமையில் பீகார் முதல்-மந்திரி நிதிஷ்குமார் அடுத்த மாதம்(ஜூன்) 15-ந் தேதி(வியாழக்கிழமை) திறந்து வைக்க உள்ளார். இதற்கான பணிகள் தற்போது நடந்து வருகிறது. இவ்வாறு அவர் கூறினார்.