ஆரணியில் கருணாநிதி நூற்றாண்டு நினைவு கைத்தறி பட்டு பூங்கா -அமைச்சர் காந்தி அறிவிப்பு

சென்னை,

தமிழக சட்டசபையில் நேற்று கைத்தறி மற்றும் துணிநூல் துறை ஆகியவற்றின் மீது எம்.எல்.ஏ.க்கள் வைத்த விவாதத்திற்கு பதிலளித்துப் பேசிய பின்னர் அமைச்சர் காந்தி வெளியிட்ட அந்த துறைகளுக்கான புதிய அறிவிப்புகள் வருமாறு:-

* அனைத்து ஜவுளிப் பிரிவுகளையும் ஒருங்கிணைத்த மாபெரும் ஜவுளி நகரம் ஒன்று பொது தனியார் கூட்டாண்மையின் அடிப்படையில் சென்னையில் அமைக்கப்படும்.

* தமிழ்நாட்டில் செயல்படும் அண்ணா கூட்டுறவு நூற்பாலை, ஆண்டிப்பட்டி மற்றும் எட்டயபுரம் பாரதி கூட்டுறவு நூற்பாலை ஆகிய நூற்பாலைகளில் ஒவ்வொன்றும் 0.999 மெ.வா. திறன் கொண்ட சூரிய மின் உற்பத்தி நிலையங்கள் நிறுவப்படும்.

* இந்த ஆண்டும் சர்வதேச தொழில்நுட்ப ஜவுளி கருத்தரங்கு சென்னையில் நடத்தப்படும்.

கைத்தறி பட்டு பூங்கா

* ஆரணியில் டாக்டர் கலைஞர் கருணாநிதி நூற்றாண்டு நினைவு கைத்தறி பட்டு பூங்கா அமைக்கப்படும்

* இளைஞர்களுக்கான நெசவு பயிற்சி மற்றும் தொழில் முனைவோர் திட்டம் செயல்படுத்தப்படும்

* கூட்டுறவு சங்கங்களில் உள்ள கைத்தறி நெசவாளர்களுக்கு வழங்கப்படும் அடிப்படை கூலியில் 10 சதவீதம் உயர்த்தி வழங்கப்படும்.

* சேமிப்பு மற்றும் பாதுகாப்பு திட்டத்தில் கைத்தறி நெசவாளர்கள் சந்தா செலுத்த வேண்டிய கால அளவு 25 ஆண்டுகளில் இருந்து 20 ஆண்டுகளாக குறைக்கப்படும்.

* கைத்தறி நெசவாளர் கூட்டுறவு சங்கங்களில் உறுப்பினர்களாக உள்ள நெசவாளர்கள் இயற்கை எய்தும்போது வழங்கப்படும் ஈமச்சடங்கு உதவித்தொகை ரூ.2 ஆயிரத்தில் இருந்து ரூ.5 ஆயிரமாக உயர்த்தி வழங்கப்படும்

* கைத்தறி நெசவாளர்கள் மிகுதியாக உள்ள பகுதிகளில் சிறப்பு மருத்துவ முகாம் நடத்தப்படும்

* கைத்தறி நெசவாளர்களுக்கு 3,006 தறிகள், உபகரணங்கள் வழங்குதல் மற்றும் 56 நெசவாளர்களுக்கு தறிக் கூடங்கள் அமைத்து தரப்படும்.

பொது வணிகச் சின்னம்

* கைத்தறி நெசவுக்கு பயன்படுத்தப்படும் சிட்டா நூல் சாயம் இடும் முறைக்கு பதிலாக நவீன முறையில் சாயம் இடும் சாத்திய கூறுகள் குறித்து ஆய்வு மேற்கொள்ளப்படும்.

* தமிழ்நாட்டின் கைத்தறி தயாரிப்புகளுக்கான பொது வணிகச் சின்னம் மற்றும் தொகுப்பாக்கல் உருவாக்கப்படும்.

* கைத்தறி ரகங்களை காட்சிப்படுத்தவும் மற்றும் சந்தைப்படுத்தவும் ஏதுவாக 4 மெட்ரோ நகரங்களில் (சென்னை, பெங்களூரு, ஐதராபாத் மற்றும் டெல்லி) வாங்குவோர் விற்போர் சந்திப்பு நடத்தப்படும்.

* வாடிக்கையாளர்களின் கைத்தறி உபபொருட்களின் தேவையை பூர்த்தி செய்வதற்கு உபபொருட்கள் விற்பனையகம் கோ-ஆப்டெக்ஸ் சென்னையில் அமைக்கப்படும்.

* கோ ஆப் டெக்ஸ் மற்றும் தொடக்க கைத்தறி நெசவாளர் கூட்டுறவு சங்கங்களின் விற்பனை நிலையங்களில் 50 மேசை தறிகள் நிறுவப்படும்.

இவ்வாறு அவர் கூறினார்.