ஈரோடு கருங்கல்பாளையம் சந்தையில் பசு மாடு ரூ.75 ஆயிரத்துக்கு விற்பனை

ஈரோடு கருங்கல்பாளையத்தில் நேற்று முன்தினம் நடந்த சந்தைக்கு 50 கன்றுக்குட்டிகள் விற்பனைக்கு கொண்டு வரப்பட்டது. இவைகள் ரூ.5 ஆயிரம் முதல் ரூ.16 ஆயிரம் வரை விற்பனை ஆனது. நேற்று நடந்த சந்தைக்கு ஈரோடு, சேலம், திருப்பூர் உள்பட பல்வேறு மாவட்டங்களில் இருந்து விவசாயிகள் மாடுகளை விற்பனைக்காக கொண்டு வந்தனர். இதில் 250 பசுமாடுகள், 200 எருமை மாடுகள் என மொத்தம் 450 மாடுகள் விற்பனைக்காக கொண்டு வரப்பட்டன.

இதில் பசு மாடு ஒன்று ரூ.30 ஆயிரம் முதல் ரூ.75 ஆயிரம் வரையிலும், எருமை மாடு ரூ.30 ஆயிரம் முதல் ரூ.60 ஆயிரம் வரையிலும் விலை போனது. இந்த மாடுகளை வாங்குவதற்காக தமிழ்நாடு மட்டுமின்றி கேரளா, கர்நாடகா, ஆந்திரா, தெலுங்கானா, மராட்டியம் உள்ளிட்ட வெளிமாநிலங்களில் இருந்து வந்திருந்த வியாபாரிகள், விவசாயிகளிடம் நேரடியாக விலை பேசி மாடுகளை வாங்கி சரக்கு வாகனங்களில் ஏற்றி சென்றார்கள். நேற்று கூடிய சந்தையில் 85 சதவீத மாடுகள் விற்பனையானதாக சந்தை நிர்வாகிகள் தெரிவித்தனர்.