கோத்தகிரி பிக் மாஸ்டர்ஸ் அணி வெற்றி

கோத்தகிரி

நீலகிரி மாவட்ட கிரிக்கெட் சங்கம் சார்பில், ஏ, பி மற்றும் சி டிவிஷன் கிரிக்கெட் போட்டிகள் கோத்தகிரி காந்தி மைதானத்தில் நடைபெற்று வருகிறது. ஒவ்வொரு டிவிஷனிலும் தலா 10 அணிகள் உறுப்பினர்களாக தங்களை பதிவு செய்து மாவட்ட அளவிலான லீக் சுற்று போட்டிகளில் பங்கேற்று விளையாடி வருகின்றன. அதிக புள்ளிகள் பெறும் 2 அணிகள் அடுத்த டிவிஷனுக்கு தகுதி பெறுகின்றன.

இந்தநிலையில் கோத்தகிரி காந்தி மைதானத்தில் நேற்று நடைபெற்ற சி டிவிஷன் போட்டியில் கோத்தகிரி பிக் மாஸ்டர்ஸ் அணியும், கோழிபள்ளம் அணியும் மோதியது. 35 ஓவர்கள் கொண்ட போட்டியில் டாஸ் வென்று முதலில் பேட்டிங் செய்த கோத்தகிரி பிக் மாஸ்டர்ஸ் அணி 22.2 ஓவர்களில் அனைத்து விக்கெட்டுகளையும் இழந்து 171 ரன்கள் எடுத்தது. இந்த அணி வீரர்கள் விக்னேஷ் 80 ரன்கள், அபிமன்யூ 29 ரன்கள் எடுத்தனர். கோழிபள்ளம் அணியின் பந்து வீச்சாளர் விக்னேஸ்வரன் 6 விக்கெட்டுகளை வீழ்த்தினார். இதைத்தொடர்ந்து 210 பந்துகளில் 172 ரன்கள் எடுத்தால் வெற்றி என்ற இலக்குடன் களமிறங்கிய கோழிபள்ளம் அணி 30.2 ஓவர்களில் அனைத்து விக்கெட்டுகளையும் இழந்து 160 ரன்கள் மட்டுமே எடுத்து தோல்வியடைந்தது. இந்த அணி வீரர்கள் சதாம் உசேன் 61 ரன்கள், பிரசாந்த் 40 ரன்கள் எடுத்தனர். கோத்தகிரி பிக் மாஸ்டர்ஸ் அணியின் பந்து வீச்சாளர்கள் பர்மான் கான், சபீக் தலா 3 விக்கெட்டுகளை வீழ்த்தினர். இதன் மூலம் கோத்தகிரி பிக் மாஸ்டர்ஸ் அணி 11 ரன்கள் வித்தியாசத்தில் வெற்றி பெற்றது.