லாரி மோதி தொழிலாளி பலி

சிவகாசி,

சிவகாசி வெள்ளையன் சாமியார் தெருவை சேர்ந்த செல்லையா மகன் கனிராஜ் (வயது37). இவர் சிவகாசியில் உள்ள அச்சகத்தில் தொழிலாளியாக வேலை செய்து வந்தார். இந்தநிலையில் சம்பவத்தன்று ஜக்கம்மாள் கோவில்- வெம்பக்கோட்டை சாலையில் தனது மோட்டார் சைக்கிளில் சென்று கொண்டிருந்தார். அப்போது அவருக்கு பின்னால் வந்த லாரி அவர் மீது மோதியதாக கூறப்படுகிறது. இதில் சிறிது தூரம் இழுத்து செல்லப்பட்ட கனிராஜுக்கு உடல் முழுவதும் பலத்த காயம் ஏற்பட்டது. உடனடியாக அப்பகுதியை சேர்ந்தவர்கள் அவரை மீட்டு சிவகாசி அரசு ஆஸ்பத்திரியில் சிகிச்சைக்காக சேர்த்தனர்.

அங்கு அவரை பரிசோதித்த டாக்டர், கனிராஜ் ஏற்கனவே இறந்து விட்டதாக தெரிவித்தார். இந்த விபத்து குறித்து கனிராஜ் மனைவி விஜயலட்சுமி சிவகாசி டவுன் போலீசில் புகார் கொடுத்தார். அந்த புகாரின் பேரில் போலீசார் விபத்துக்கு காரணமான லாரியை ஓட்டி வந்த சிவகாசி கங்காகுளத்தைச் சேர்ந்த முத்தையா மகன் சிங்கராஜ் என்பவர் மீது வழக்குப்பதிவு செய்து விசாரணை நடத்தி வருகின்றனர்.