லாரி மோதி, கல்லூரி மாணவர் பலி

ஸ்ரீவில்லிபுத்தூர்,

விருதுநகர் மாவட்டம் ராஜபாளையம் அருகே உள்ள புனல்வேலி கிராமத்தை சேர்ந்தவர், பூமிராஜன். இவருடைய மகன் மதன்குமார் (வயது 19). இவர் ஒரு தனியார் கல்லூரியில் பி.பி.ஏ. 2-ம் ஆண்டு படித்து வந்தார். இவருடைய நண்பர் சுப்பிரமணியன் (19). இவர்கள் இருவரும் இருசக்கர வாகனத்தில் கல்லூரிக்கு சென்று கொண்டு இருந்தனர்.

ஒரு பாலத்தின் அருகே சென்ற போது அந்த வழியாக வந்த லாரி இவர்கள் சென்ற இருசக்கர வாகனத்தின் மீது மோதியது. இதில் அவர்கள் நிலை தடுமாறி கீழே விழுந்தனர். இந்த விபத்தில் மதன்குமாருக்கு படுகாயம் ஏற்பட்டது. உடனே அவரை மீட்டு சிகிச்சைக்காக ஸ்ரீவில்லிபுத்தூர் அரசு மருத்துவமனைக்கு கொண்டு சென்றனர். ஆனால் அங்கு மதன்குமார் பரிதாபமாக இறந்தார்.

இந்த சம்பவம் குறித்து சுப்பிரமணியன் அளித்த புகாரின் பேரில் ஸ்ரீவில்லிபுத்தூர் நகர் போலீசார், லாரி டிரைவர் முருகன் மீது வழக்குப்பதிவு செய்து விசாரணை நடத்தி வருகின்றனர்.