பெட்ரோல் பங்க் ஊழியரை கொன்ற 2 பேருக்கு ஆயுள் தண்டனை-சேலம் கோர்ட்டு தீர்ப்பு

பெட்ரோல் பங்க்

சேலம் மாவட்டம் இளம்பிள்ளை அருகே சந்தைப்பேட்டை பகுதியை சேர்ந்தவர் கிளக்கள்ளன். இவருடைய மகன்கள் ராஜூ (வயது 24), விஜி (18). இவர்களது நண்பர் கொழிஞ்சானூர் வெள்ளக்காரமேடு பகுதியை சேர்ந்த கேசவன் (20).

இவர்கள் 3 பேரும் கடந்த 2013-ம் ஆண்டு மார்ச் மாதம் 8-ந்தேதி மகுடஞ்சாவடியில் உள்ள ஒரு பெட்ரோல் பங்க்கில் மோட்டார் சைக்கிளுக்கு பெட்ரோல் நிரப்பினர்.

சாவு

அப்போது இவர்கள் 3 பேருக்கும், பெட்ரோல் பங்க் ஊழியர் இளம்பிள்ளை பகுதியை சேர்ந்த கணேசன் மகன் கோவிந்தராஜ் (27) என்பவருக்கும் தகராறு ஏற்பட்டது. தகராறு முற்றவே ஆத்திரம் அடைந்த 3 பேரும் சேர்ந்து தாக்கியதில் கோவிந்தராஜ் பரிதாபமாக இறந்தார்.

இதுகுறித்து மகுடஞ்சாவடி போலீசார் வழக்குப்பதிவு செய்து 3 பேரையும் கைது செய்து சேலம் சிறையில் அடைத்தனர். இந்த வழக்கு சேலம் 2-வது கூடுதல் அமர்வு கோர்ட்டில் நடந்து வந்தது.

ஆயுள் தண்டனை

இந்த நிலையில் வழக்கு விசாரணை முடிவடைந்து நேற்று தீர்ப்பு கூறப்பட்டது. பெட்ரோல் பங்க் ஊழியர் கோவிந்தராஜை அடித்துக்கொன்ற கேசவன், விஜி ஆகிய 2 பேருக்கு ஆயுள் தண்டனையும், தலா ரூ.5 ஆயிரம் அபராதமும் விதித்து நீதிபதி ரவி தீர்ப்பு அளித்தார். இந்த வழக்கில் கைதான ராஜூ ஏற்கனவே இறந்து விட்டார்.