ஆயுள் தண்டனை கைதி தப்பி ஓடினார்; ஏட்டு மோட்டார் சைக்கிளை திருடிச் சென்றதால் பரபரப்பு

பாளையங்கோட்டை சிறையில் போலீஸ் ஏட்டு மோட்டார் சைக்கிளை திருடிக் கொண்டு ஆயுள் தண்டனை கைதி தப்பி சென்றார்.

ஆயுள் தண்டனை கைதி

நெல்லை மாவட்டம் ராதாபுரம் மதகனேரி பகுதியைச் சேர்ந்தவர் டேவிட் (வயது 46). இவர் மீது தென்காசி மாவட்டம் பாவூர்சத்திரம் போலீஸ் நிலைய எல்லைக்கு உட்பட்ட பகுதியில் நடந்த ஒரு கொலை வழக்கில் குற்றம் சாட்டப்பட்டு, நெல்லை கோர்ட்டில் கடந்த 2018-ம் ஆண்டு ஆயுள் தண்டனை விதிக்கப்பட்டது. இதையடுத்து அவர், பாளையங்கோட்டை மத்திய சிறையில் ஆயுள் தண்டனை கைதியாக இருந்து வந்தார்.

சிறையில் இருந்தபோது டேவிட் எந்த தவறும் செய்யாமல் சிறை விதிகளை பின்பற்றி நடந்ததால், அவரை நன்னடத்தை கைதி என்று அறிவித்து, பாளையங்கோட்டை சிறை வளாகத்தில் சிறைத்துறை மூலம் நடத்தப்படும் டீக்கடையில் டீ மாஸ்டராக நியமித்தனர். இவர் சிறை வளாகத்தில் உள்ள டீக்கடையில் தினமும் காலை முதல் மாலை வரை பணியாற்றினார்.

ஏட்டு மோட்டார் சைக்கிளை திருடி...

நேற்று காலையில் டேவிட் வழக்கம்போல் சிறை வளாகத்தில் உள்ள டீக்கடைக்கு வேலைக்கு சென்றார். பின்னர் மாலை 6.40 மணியளவில் அங்கு நிறுத்தப்பட்டு இருந்த போலீஸ் ஏட்டு மாரியப்பனின் மோட்டார் சைக்கிளை டேவிட் நைசாக திருடிக் கொண்டு, அதில் ஏறி தப்பி சென்றார்.

சிறிதுநேரத்தில் சிறை காவலர்கள் கைதிகளை கணக்கெடுத்தபோது, டேவிட் தப்பியதை அறிந்து அதிர்ச்சி அடைந்தனர். இதுகுறித்து சிறை அதிகாரிகள் பெருமாள்புரம் போலீசாருக்கு தகவல் தெரிவித்தனர். உடனே போலீசார் சம்பவ இடத்திற்கு விரைந்து சென்று பார்வையிட்டு, தப்பி ஓடிய கைதியை வலைவீசி தேடி வருகிறார்கள். மேலும் சிறை காவலர்களிடமும் விசாரணை மேற்கொண்டு வருகின்றனர்.

தீவிர தேடுதல் வேட்டை

தப்பி சென்ற ஆயுள் தண்டனை கைதியை பிடிப்பதற்காக நெல்லை மாநகர துணை போலீஸ் கமிஷனர் சீனிவாசன் நேரடி மேற்பார்வையில், நெல்லை மாநகர பகுதியில் உள்ள அனைத்து இன்ஸ்பெக்டர்கள் தலைமையில் போலீசார் தீவிர தேடுதல் வேட்டையில் ஈடுபட்டனர். பல்வேறு இடங்களிலும் வாகன தணிக்கையில் ஈடுபட்டனர்.

நெல்லையில் ஏட்டுவின் மோட்டார் சைக்கிளை திருடிக் கொண்டு ஆயுள் தண்டனை கைதி தப்பி சென்ற சம்பவம் பெரும் பரபரப்பை ஏற்படுத்தியது.