இரட்டை கொலை வழக்கில் லாரி டிரைவர் கைது

இரட்டை கொலை

ராணிப்பேட்டை மாவட்டம் வாலாஜாவை அடுத்த வி.சி.மோட்டூர் பிள்ளையார் கோவில் தெருவை சேர்ந்தவர் குழந்தைவேல் (வது 35). சரக்கு ஆட்டோ டிரைவர். தனலட்சுமி நகர் பகுதியை சேர்ந்தவர் சரவணன் (35), லாரி எலக்ட்ரிஷியன். நண்பர்களான இவர்கள் இருவரும் .நேற்று முன்தினம் மாலை புத்தாண்டை முன்னிட்டு வி.சி.மோட்டூரில் உள்ள லாரி பழுது பார்க்கும் நிலையத்தில் மது அருந்தியதாக கூறப்படுகிறது.

அப்போது அங்கு வந்த மர்ம நபர் ஒருவர் குழந்தைவேலுவை கத்தியால் குத்தியுள்ளார். இதனை தடுக்க சென்ற சரவணனையும் குத்தி விட்டு அங்கிருந்து தப்பி ஓடிவிட்டார். கத்தி குத்தில் காயமடைந்த இருவரும் சிகிச்சை பலனின்றி உயிரிழந்தனர்.

லாரி பழுது பார்க்க...

அந்த சம்பவம் குறித்து துணைபோலீஸ் சூப்பிரண்டு பிரபு, இன்ஸ்பெக்டர் காண்டீபன் மற்றும் போலீசார் வழக்குப் பதிவு செய்து கொலை செய்த மர்ம நபர் யார்? எந்த ஊரை சேர்ந்தவர் என அங்கிருந்த கண்காணிப்பு கேமராவில் பதிவான ஒரு நபரை பிடித்து விசாரணை நடத்தினர். மேலும் மாவட்ட போலீஸ் சூப்பிரண்டு தீபா சத்யன் உத்தரவின் பேரில் 2 தனிப்படை அமைக்கப்பட்டு் தீவிர விசாரணை மேற்கொண்டனர்.

விசாரணையில் வி.சி.மோட்டூரில் லாரி பழுதுபார்க்கும் நிலையம் உள்ளது. இங்கு புத்தாண்டு விடுமுறையையொட்டி லாரியை பழுது பார்ப்பதற்காக திருத்தணியை அடுத்த டி.புதூர் பெரிய தெருவை சேர்ந்த நிர்மல்குமார் (25) என்ற லாரி டிரைவர் தனது லாரியை பழுது பார்க்க கொண்டு வந்து நிறுத்தியுள்ளார்.

டிரைவர் கைது

அப்போது நிர்மல்குமாருக்கும், மெக்கானிக் சரவணனுக்கும் இடையே வாக்குவாதம் ஏற்பட்டுள்ளது. வாக்குவாதம் முற்றி சரவணன் மற்றும் குழந்தைவேலு ஆகிய இருவரும் நிர்மல்குமார் லாரியின் முன்பக்க கண்ணாடியை உடைத்ததாக கூறப்படுகிறது. மேலும் நிர்மல் குமாரை தாக்க முயன்றதாகவும் தெரிகிறது. தொடர்ந்து குழந்தைவேலு யாருக்கோ போன் செய்துள்ளார்.

இதனால் நிர்மல்குமார் அச்சமடைந்துள்ளார். திடீரென அவர் லாரியில் வைத்திருந்த கத்தியை எடுத்து குழந்தைவேலு மற்றும் சரவணன் ஆகியோரை சாலையில் ஓட ஓட விரட்டி சரமாரியாக குத்தி உள்ளார். நிர்மல்குமாருக்கு ஏற்கெனவே கொலை முயற்சி கொள்ளை, அடிதடி உள்ளிட்ட பல்வேறு வழக்குகளில் தொடர்புடையதும், அவர் மீது ஏற்கனவே பல குற்ற வழக்குகள் நிலுவையில் உள்ளதாகவும் போலீசார் தெரிவித்தனர். இதனை தொடர்ந்து நிர்மல்குமாரை கைது போலீசார் கைது செய்து தொடர்ந்து விசாரணை மேற்கொண்டு வருகின்றனர்.