பல்லடத்தில் பள்ளி வேன் மீது சரக்கு லாரி மோதி ஏற்பட்ட விபத்தில் மாணவ, மாணவிகள் அதிர்ஷ்ட வசமாக உயிர் தப்பினர்.

பல்லடம்

பல்லடத்தில் பள்ளி வேன் மீது சரக்கு லாரி மோதி ஏற்பட்ட விபத்தில் மாணவ, மாணவிகள் அதிர்ஷ்ட வசமாக உயிர் தப்பினர்.

இது குறித்து போலீஸ் தரப்பில் கூறப்படுவதாவது:-

வேன் மீது லாரி மோதல்

பல்லடம் - தாராபுரம் சாலையில் தனியார் மேல்நிலைப்பள்ளி இயங்கி வருகிறது. இந்த நிலையில் நேற்று மாலை பள்ளி முடிந்ததும் 25-க்கும் மேற்பட்ட மாணவ-மாணவிகள் பள்ளி வேனில் சென்றனர். இந்த வேன் கோவை -திருச்சி தேசிய நெடுஞ்சாலையில் பனப்பாளையத்தில் இருந்து பெத்தாம்பாளையம் செல்லும் பிரிவில் திரும்ப முயன்றதாக கூறப்படுகிறது. அப்போது சென்னையில் இருந்து கோவை நோக்கி வந்த சரக்கு லாரி ஒன்று ஓட்டுனரின் கட்டுப்பாட்டை இழந்து பள்ளி வேனின் பின்புறமாக பக்கவாட்டில் மோதியது.அதன் பின்னரும் நிற்காமல் அருகே உள்ள பெருமாள் கோவில் சுற்று சுவரில் மோதி நின்றது.

இந்த விபத்தில் பள்ளி ேவனில் பயணம் செய்த 6-ம் வகுப்பு மாணவன் மற்றும் 7-ம் வகுப்பு மாணவி ஆகிய இருவர் காயம் அடைந்தனர். மேலும் வேனில் பயணம் செய்த மாணவ-மாணவிகள் அதிர்ஷ்டவசமாக உயிர் தப்பினர். இச்சம்பவம் குறித்து தகவல் அறிந்து அங்கு விரைந்து வந்த பல்லடம் போலீசார் விபத்துக்குள்ளான வாகனங்களை அப்புறப்படுத்தி போக்குவரத்தை சீர் செய்தனர். மேலும் விபத்துக்குள்ளான பள்ளி வேனில் இருந்த மாணவ, மாணவிகளை மாற்று வாகனம் மூலம் அனுப்பி வைத்தனர். விபத்தை ஏற்படுத்திய லாரி டிரைவர் ராஜா என்பவரை பிடித்து பல்லடம் போலீசார் விசாரணை நடத்தி வருகின்றனர்.

மற்றொரு விபத்து

இதே போல் பல்லடம் - தாராபுரம் சாலை பிரிவு அருகே தேனி மாவட்டத்தில் இருந்து 25-க்கும் மேற்பட்ட பயணிகளுடன் கோவை-மேட்டுப்பாளையம் நோக்கிச் சென்ற அரசுப் பஸ் ஒன்று முன்னாள் சென்ற காரின் பின்புறமாக மோதி விபத்து ஏற்பட்டது. இதில் கார் ரோட்டோர பள்ளத்தில் கவிழ்ந்து அப்பளம் போல் நொறுங்கியது. காரை ஓட்டி வந்த டிரைவர் லேசான காயங்களுடன் உயிர் தப்பினார். இந்த 2 விபத்துக்கள் குறித்து பல்லடம் போலீசார் விசாரணை நடத்தி வருகின்றனர்.