மதுரையில் பரபரப்பு: கடைக்குள் ஓடி தஞ்சம் அடைந்த ஆட்டோ டிரைவரை கழுத்தை அறுத்து கொன்ற பயங்கரம் - தப்பிச்சென்ற 3 பேர் யார்? தீவிர விசாரணை

கடைக்குள் ஓடி தஞ்சம் ஆட்டோ டிரைவரை கழுத்தை அறுத்து கொன்ற பயங்கர சம்பவம் பரபரப்பை ஏற்படுத்தியது. இதில் தொடர்புடைய 3 பேர் யார்? என்பது குறித்து போலீசார் தீவிர விசாரணை நடத்தி வருகிறார்கள்.

ஆட்டோ டிரைவர் கொலை

மதுரை வண்டியூர் யாகப்பா நகர் அருகே உள்ள பாண்டியன் நகர் பகுதியைச் சேர்ந்தவர் கணேசன். இவருடைய மகன் வாசுதேவன் ( வயது 28), ஆட்டோ டிரைவர். இவருக்கு திருமணம் ஆகி ஒரு குழந்தை உள்ளது.

நேற்று மாலை அருகில் உள்ள சிவசக்திநகர் சந்திப்புக்கு நடந்து சென்றார். அப்போது அவரை 3 இளைஞர்கள் திடீரென வழிமறித்து தகராறு செய்தனர்.

பின்னர் அவர்கள், வாசுதேவனை தாக்க முயன்றனர். உடனே அவர் அங்கிருந்து ஓட்டம் பிடித்து, துணிகள் தேய்க்கும் ஒரு கடைக்குள் புகுந்து தஞ்சம் அடைந்தார். ஆனாலும் அவர்கள் விடாமல் கடைக்குள் சென்று வாசுதேவனை சரமாரியாக கத்தியால் வெட்டி, கழுத்தை அறுத்து விட்டு தப்பினர்.

இந்த சம்பவத்தை அறிந்து அந்த பகுதி மக்கள் அங்கு திரண்டு வந்தனர். ரத்தவெள்ளத்தில் கிடந்த அவரை மீட்டு கார் மூலம் அருகே உள்ள ஆஸ்பத்திரிக்கு கொண்டு சென்றனர். அங்கு டாக்டர் பரிசோதனை செய்த போது, ஏற்கனவே வாசுதேவன் இறந்துவிட்டது தெரியவந்தது..

3 பேருக்கு வலைவீச்சு

தகவல் அறிந்து அண்ணாநகர் போலீசார் சம்பவ இடத்திற்கு விரைந்து சென்றனர்.

வாசுேதவனின் உடலை பரிசோதனைக்காக அரசு ஆஸ்பத்திரிக்கு அனுப்பி வைத்தனர். சம்பவம் குறித்து வழக்குப்பதிவு செய்து விசாரணை நடத்தி வருகின்றனர்.

முன்விரோதம் காரணமாக இந்த கொலை நடந்திருக்கலாம் என்றும், கொலையில் தொடர்புடையவர்கள் யார் யார்? என்பது குறித்தும் தொடர்ந்து விசாரணை நடந்து வருவதாக போலீசார் தெரிவித்தனர். இந்த சம்பவத்தால் அந்த பகுதியில் பதற்றம் ஏற்பட்டது. போலீசார் குவிக்கப்பட்டு பாதுகாப்பு பணிகளை மேற்கொண்டு வருகிறார்கள். தப்பிச்சென்ற கொலையாளிகளை தேடி வருகிறார்கள்.