வீடு புகுந்து எந்திரங்களை திருடியவர் கைது

கொல்லங்கோடு:

கொல்லங்கோடு அருகே வீடு புகுந்து எந்திரங்களை திருடியவர் கைது செய்யப்பட்டார்.

கொல்லங்கோடு அருகே உள்ள சாத்தன்கோடு கடம்புவிளையை சேர்ந்தவர் காமராஜர். இவருடைய மகன் ஜெபராஜ் (வயது35), வெல்டிங் வேலை செய்து வருகிறார். இவர்களுக்கும் அதே பகுதியை சேர்ந்த விஜயகுமார் (37) என்பவருக்கும் இடையே முன்விரோதம் இருந்து வந்தது. சம்பவத்தன்று விஜயகுமார், ஜெபராஜின் வீட்டிற்குள் அத்துமீறி நுழைந்து தகராறில் ஈடுபட்டு அங்கு நின்ற காரில் வைக்கப்பட்டிருந்த வெல்டிங் எந்திரங்கள் மற்றும் உபகரணங்களை திருடி சென்றார். இதுகுறித்து ஜெபராஜ் கொடுத்த புகாரின் பேரில் கொல்லங்கோடு போலீசார் வழக்குப்பதிவு செய்து விஜயகுமாரை தேடி வந்தனர். இந்தநிலையில் நேற்று முன்தினம் அவரது வீட்டில் வைத்து விஜயகுமாரை போலீசார் கைது செய்து சிறையில் அடைத்தனர்.