மாட்டுப் பொங்கலையொட்டி திருவந்திபுரம் கெடிலம் ஆற்றில் மஞ்சுவிரட்டு நிகழ்ச்சி

நெல்லிக்குப்பம்,

கடலூர் அருகே திருவந்திபுரத்தில் புகழ்பெற்ற தேவநாதசுவாமி கோவில் அமைந்துள்ளது. 108 வைணவ தலங்களில் ஒன்றான இக்கோவிலில் பொங்கல் பண்டிகையையொட்டி தேவநாதசுவாமி மற்றும் தாயாருக்கு நேற்று முன்தினம் சிறப்பு திருமஞ்சனம் மற்றும் மகா தீபாராதனை நடைபெற்றது.

இந்த நிலையில் மாட்டுப்பொங்கலையொட்டி நேற்று அதிகாலை 4 மணியளவில் கோவிலில் விஸ்வரூப தரிசனம் நடைபெற்றது. அதனை தொடர்ந்து ஆண்டாள் மற்றும் தாயாருடன் தேவநாதசுவாமி கோவில் உட்பிரகாரத்தில் வலம் வந்து பக்தர்களுக்கு அருள் பாலித்தார்.

தீர்த்தவாரி

இதையடுத்து உற்சவர் கெடிலம் ஆற்றில் எழுந்தருளியதும் தீர்த்தவாரி நடைபெற்றது. பின்னர் மாலையில் தேவநாதசுவாமி வெள்ளி குதிரை வாகனத்தில் எழுந்தருளி, பரிவேட்டைக்காக திருவந்திபுரம் கெடிலம் ஆற்றுக்கு புறப்பட்டார். அப்போது சாமிக்கு முன்பாக நாதஸ்வர கலைஞர்கள் நாதஸ்வரம் வாசிக்க, பட்டர்கள் வேத பாராயணம் பாடிக்கொண்டு சென்றனர்.

பின்னர் தேவநாதசுவாமி கெடிலம் ஆற்றில் இறங்கினார். அப்போது திருவந்திபுரம், சாலக்கரை, கே.என்.பேட்டை, பாதிரிக்குப்பம், பில்லாலி தொட்டி உள்ளிட்ட பல்வேறு பகுதிகளை சேர்ந்த கிராம மக்கள் தாங்கள் வளர்த்து வரும் பசு மற்றும் காளை மாடுகளை அலங்கரித்து ஆற்றுக்குள் கொண்டு வந்தனர்.

மஞ்சுவிரட்டு நிகழ்ச்சி

இதைத் தொடர்ந்து தேவநாதசுவாமி குதிரை வாகனத்தில் இருந்தபடி அங்கிருந்த மாடுகளை மூன்று முறை சுற்றி வந்து பக்தர்களுக்கு அருள்பாலித்தார். பின்னர் தேவநாதசுவாமி ஆற்றின் மறுகரைக்கு சென்று பரிவேட்டை ஆடினார். இதையடுத்து மாலை 5 மணியளவில் மாடுகளை விரட்டும் மஞ்சுவிரட்டு நிகழ்ச்சி நடைபெற்றது.

அப்போது அனைத்து மாடுகளும் ஆற்றின் கரையை நோக்கி ஓடின. இதனை ஆற்றங்கரையிலும், பாலத்தின் மேலே நின்றபடியும் ஏராளமான பொதுமக்கள் கண்டு களித்தனர். மஞ்சுவிரட்டு நிகழ்ச்சி முடிந்ததும் தேவநாதசுவாமி ஆற்றங்கரை மண்டபத்திற்கு கொண்டு செல்லப்பட்டார். அங்கு சுவாமிக்கு தீபாராதனை காண்பிக்கப்பட்டது. இதை தொடர்ந்து திருவந்திபுரத்தில் சாமி வீதி உலா நடைபெற்றது. விழாவிற்கான ஏற்பாடுகளை கோவில் நிர்வாகிகள் செய்திருந்தனர்.