காரைக்குடி நகர்மன்ற கூட்டம்

காரைக்குடி,

காரைக்குடி நகர்மன்ற கூட்டம் தலைவர் முத்துத்துரை தலைமையில் நடைபெற்றது. துணை தலைவர் குணசேகரன் முன்னிலை வகித்தார். ஆணையாளர் லெட்சுமணன், என்ஜினீயர் கோவிந்தராஜன் மற்றும் அதிகாரிகள், உறுப்பினர்கள் கூட்டத்தில் கலந்து கொண்டனர்.

கூட்டத்தில் நடந்த விவாதம் வருமாறு:- உறுப்பினர் மைக்கேல்:- வீடு கட்டுவதற்கான வரைபட அனுமதி கொடுக்கும்போது அப்பகுதியின் மன்ற உறுப்பினர்களையும் கலந்து ஆலோசனை செய்ய வேண்டும். கண்ணன்:- ஐந்து விலக்கு பகுதியில் தனியாருக்கு சொந்தமான இடம் குப்பைக்கிடங்காக மாறி நகரின் அழகை கெடுப்பதோடு சுகாதார கேட்டினையும் விளைவிக்கிறது.

தலைவர்:-. ஐந்து விலக்கு அருகே சுகாதார கேடு ஏற்படுத்துபவர்களுக்கு நோட்டீஸ் அனுப்பி நடவடிக்கை மேற்கொள்ளப்படும். பசும்பொன் மனோகரன்:- சுகாதார ஆய்வாளர்கள் அவரவர்களுக்கு ஒதுக்கப்பட்ட பகுதிகளில் சுகாதார பணிகளை முடுக்கிவிட்டு மேற்பார்வையிடவேண்டும். ரெத்தினம்:- எனது பகுதியில் மழை காலங்களில் தண்ணீர் வீடுகளுக்குள் புகுந்து விடுவதால் கால்வாய்களை தூர்வார வேண்டும். குணசேகரன்:- தேவஸ்தானத்திற்கு சொந்தமான இடங்களில் 4 ஆயிரம் வீடுகள் கட்டப்பட்டு மக்கள் வசிக்கின்றனர். இவர்களுக்கு தடையில்லா சான்றிதழ் பெற்று நகராட்சி வரி விதிப்பு செய்ய வேண்டும். இதன் மூலம் நகராட்சிக்கு வருமானம் உயரும்.

தலைவர்:- உறுப்பினர்களின் கோரிக்கைகள் கவனமுடன் பரிசீலிக்கப்பட்டு நடவடிக்கை மேற்கொள்ளப்படும். இவ்வாறு விவாதம் நடந்தது. மேலும், அமைச்சர் கே.ஆர்.பெரிய கருப்பன் தேசிய விருது பெற்றதற்கு நகர்மன்றத்தின் சார்பில் வாழ்த்து தெரிவிக்கப்பட்டது. பின்னர் அனைத்து தீர்மானங்களும் நிறைவேற்றப்பட்டதாக அறிவிக்கப்பட்டது.