நிலம் தருவதாக பணமோசடி; ஒருவருக்கு வலைவீச்சு

திசையன்விளை:

திசையன்விளை சுடர்நகர் முத்து பேச்சியம்மன் கோவில் தெருவை சேர்ந்தவர் பூத்துரை மகன் ஷேபின் (வயது 22). திசையன்விளை- உடன்குடி ரோட்டில் பர்னிச்சர் கடை நடத்தி வருபவர் ஜெயகோபால் (40). இவருக்கு சொந்தமான இடத்தை ஷேபின் விலைபேசி ரூ.6 லட்சத்து 85 ஆயிரம் கொடுத்துள்ளார். பணத்தை பெற்று கொண்ட ஜெயகோபால் அந்த இடத்தை வேறு ஒருவருக்கு பத்திரப்பதிவு செய்து கொடுத்துள்ளார். இதை அறிந்த ஷேபின் அவரிடம் பணத்தை திருப்பி தரும்படி கேட்டுள்ளார். ஆனால் அதற்கு அவர் மறுத்ததாக கூறப்படுகிறது. இதுகுறித்து ஷேபின் திசையன்விளை போலீசில் புகார் செய்தார். இன்ஸ்பெக்டர் ராஜ் வழக்குப்பதிவு செய்து ஜெயகோபாலை தேடி வருகிறார்.