சென்னை கிண்டி கிங் நோய் தடுப்பு ஆராய்ச்சி நிலையத்தில் குரங்கு அம்மை கண்டறியும் ஆய்வகம்

சென்னை,

குரங்கு அம்மை பாதிப்பை கண்டறியும் ஆய்வு மையமாக சென்னை கிண்டி கிங் நோய் தடுப்பு ஆராய்ச்சி நிலையத்தில் ஆய்வகம் அமைக்கப்பட்டுள்ளது. இந்த ஆய்வகத்துக்கு மத்திய அரசு அனுமதி வழங்கி உள்ளது. அதன்படி அமைக்கப்பட்டுள்ள ஆய்வகத்தின் கட்டமைப்புகளை மருத்துவம்-மக்கள் நல்வாழ்வுத்துறை அமைச்சர் மா.சுப்பிரமணியன் நேற்று பார்வையிட்டார்.

அப்போது மக்கள் நல்வாழ்வுத்துறை முதன்மை செயலாளர் செந்தில்குமார், மருத்துவக்கல்வி இயக்குனர் நாராயணபாபு, பொது சுகாதாரம் மற்றும் நோய்த்தடுப்பு மருந்துத்துறை இயக்குனர் செல்வவிநாயகம் உள்பட பலர் உடனிருந்தனர்.

பின்னர் அமைச்சர் மா.சுப்பிரமணியன் நிருபர்களிடம் கூறியதாவது:-

குரங்கு அம்மை பாதிப்பு இல்லை

குரங்கு அம்மை பாதிப்புக்குள்ளாகி இருக்கும் 77 நாடுகளின் பட்டியல், அந்தந்த விமான நிலையங்களில் விளம்பரப்படுத்தப்பட்டு உள்ளது. இந்த நாடுகளில் இருந்து வேறு நாடுகளுக்கு சென்று தமிழகம் வருபவர்களை கண்காணிக்க அறிவுறுத்தப்பட்டுள்ளது.

அவ்வாறு வருபவர்களின் முகம், முழங்கைக்கு கீழ் ஏதாவது அறிகுறி இருக்கிறதா? என்பதை கண்காணிக்கவும் அறிவுறுத்தப்பட்டு இருக்கிறது. அந்த வகையில் தமிழகத்தில் குரங்கு அம்மை பாதிப்பு கண்டறியப்படவில்லை. என்றாலும், கனடா, அமெரிக்காவில் இருந்து 2 பயணிகளுக்கு முகத்தில் இருந்த கொப்பளங்கள் ஆய்வு என்ற முறையில் மாதிரிகள் எடுக்கப்பட்டு, புனேவில் இருக்கிற ஆய்வகத்துக்கு அனுப்பப்பட்டது. இந்த ஆய்வின் முடிவில் அது குரங்கு அம்மை பாதிப்பு இல்லை என்பது தெளிவானது.

மத்திய அரசு ஏற்கனவே இந்தியாவில் 15 இடங்களில் குரங்கு அம்மைக்கான பாதிப்பை கண்டறியும் ஆய்வகங்கள் தொடங்கப்படும் என்று அறிவித்து இருந்தது. முதல்-அமைச்சர் தமிழகத்திலும் அமைய வேண்டியதன் அவசியத்தை மத்திய அரசுக்கு அறிவுறுத்தினார்.

ஆய்வு மையம்

அதன் அடிப்படையில் கிண்டியில் உள்ள கிங் நோய் தடுப்பு மற்றும் ஆராய்ச்சி நிலைய வளாகத்தில் இருக்கிற ஆய்வகத்தை இதற்கு பயன்படுத்தி கொள்ளலாம் என்று தெரிவித்துள்ளது. இந்தியாவில் உள்ள ஆய்வகங்களில் இதையும் ஒன்றாக பயன்படுத்தி கொள்ளலாம். ஏற்கனவே கொரோனா பரிசோதனை மையமாக செயல்பட்டு, 31 லட்சம் மாதிரிகள் இங்கு பரிசோதிக்கப்பட்டு உள்ளன.

குரங்கு அம்மை பரிசோதனை என்பது தோல், புண் மாதிரி பரிசோதனைகள், சிறுநீர், சீரம் மற்றும் பிளாஸ்மா பரிசோதனை செய்யப்படும். இதற்கான ஆய்வகம் தற்போது முறையாக தொடங்கப்பட்டு உள்ளன. இனி புனேவுக்கு அனுப்ப வேண்டிய அவசியம் இல்லை.

180-க்கும் மேற்பட்ட நாடுகளில் இருந்து 2 ஆயிரத்துக்கும் மேற்பட்ட செஸ் விளையாட்டு வீரர்கள் வந்திருக்கின்றனர். வரும் அனைவருக்குமே கொரோனா பரிசோதனை விமான நிலையங்களில் நடத்தப்படுகிறது. தொற்று இருந்தால், அவர்களை தனிமைப்படுத்தும் நிகழ்வு நடைபெறும். குரங்கு அம்மை பாதிப்பு இருக்கும் நாடுகள் 77 என்றாலும், வெளிநாடுகளில் இருந்து வரும் அனைத்து விமான பயணிகளையும் முழுமையாக குரங்கு அம்மை பரிசோதனைகள் உறுதிப்படுத்தப்பட்டுள்ளது. இதுவரை வந்திருக்கும் விளையாட்டு வீரர்கள் யாருக்கும் குரங்கு அம்மை அறிகுறி இல்லை.

21 விடுதிகளில் அவர்கள் தங்க வைக்கப்பட்டு உள்ளனர். அங்கு டாக்டர்கள், நர்சுகள், மருந்தாளுனர்கள் இருக்கின்றனர். அதனையும் கடந்து 8 விடுதிகளில் மருத்துவ முகாம்களும் நடைபெறுகின்றன. விளையாட்டு நடைபெறும் இடங்களில் சிறப்பு டாக்டர்கள் அடங்கிய முகாமும் இருக்கிறது. இதுதவிர 30 ஆம்புலன்சுகள் இருக்கின்றன. யோகா பயிற்சி அளிக்கும் பயிற்றுனர்களும் நியமிக்கப்பட்டு உள்ளனர். 8 மாத கர்ப்பிணி விளையாட்டு வீரர் வர இருக்கிறார். அவருக்காக மகப்பேறு டாக்டர் ஒருவரும் நியமிக்கப்பட்டுள்ளார்.

இவ்வாறு அவர் கூறினார்.