மொபட் மீது கிரேன் வாகனம் மோதி தாய்-மகள் சாவு

தண்டராம்பட்டு

தண்டராம்பட்டு அருகே மொபட் மீது கிரேன் வாகனம் மோதி தாய்-மகள் பரிதாபமாக இறந்தனர். விவசாயி படுகாயம் அடைந்தார்.

மருத்துவமனைக்கு சென்றனர்

திருவண்ணாமலை மாவட்டம் தண்டராம்பட்டு அருகே உள்ள வாக்கிலாபட்டு கிராமம் கங்கை அம்மன் கோவில் தெருவை சேர்ந்தவர் அழகேசன் (வயது 48), விவசாயி. இவரது பாட்டி உடல் நலக்குறைவால் தண்டராம்பட்டு அரசு மருத்துவமனையில் சிகிச்சை பெற்று வருகிறார்.

இவரை பார்ப்பதற்காக நேற்று காலை தனது தாயார் மணியம்மாள் (65) என்பவரை மொபட்டில் அழைத்துக் கொண்டு சென்றனர்.

மேலும் அருகில் உள்ள அகரம் கிராமத்தில் இருந்த தங்கை சியாமளாவையும் (40) மொபட்டில் அழைத்துக் கொண்டு தண்டராம்பட்டு அரசு மருத்துவமனைக்கு சென்று கொண்டிருந்தார்.

ராதாபுரம் என்ற இடத்தில் நான்கு வழி சாலைக்காக பணிகள் நடைபெற்று வருகிறது. அங்கே கொட்டி வைக்கப்பட்டிருந்த ஜல்லிகள் மீது மொபட் ஏறி இறங்கும் போது பின்னால் வந்த கிரேன் வாகனம் எதிர்பாராத விதமாக மொபட் மீது மோதியது.

தாய்-மகள் சாவு

இதில் தூக்கி வீசப்பட்ட மணியம்மாள், சியாமளா ஆகிய இருவரும் கிரேன் வாகனத்தின் சக்கரத்தில் சிக்கி சம்பவ இடத்தில் உடல் நசுங்கி பரிதாபமாக இறந்தனர். அழகேசன் படுகாயங்களுடன் உயிர் தப்பினார்.

இதுகுறித்து தகவல் அறிந்த தண்டாம்பட்டு போலீசார் சம்பவ இடத்திற்கு வந்து 2 பேரின் உடல்களையும் மீட்டு பிரேத பரிசோதனைக்காக திருவண்ணாமலை அரசு மருத்துவக்கல்லூரி மருத்துவமனைக்கு அனுப்பி வைத்தனர் .படுகாயம் அடைந்த அழகேசன் திருவண்ணாமலை அரசு மருத்துவமனையில் சிகிச்சை பெற்று வருகிறார்

இதுகுறித்து போலீசார் வழக்குப்பதிவு செய்து கிரேன் டிரைவரை தேடி வருகின்றனர்.

தான் அழைத்து வந்த தாய், தங்கை இருவரும் தனது கண் முன்னே உடல் நசுங்கி உயிரிழந்த காட்சியை பார்த்து அழகேசன் கதறி அழுத காட்சி அங்கிருந்தவர்களை பெரும் சோகத்தில் ஆழ்த்தியது.