மினிவேன் மோதி தாய்-மகன் படுகாயம்

வடமதுரை அருகே உள்ள சித்துவார்பட்டி நாகன் களத்தூரை சேர்ந்தவர் திருப்பாண்டி (வயது 25). நேற்று முன்தினம் இவர், தனது தாய் பேச்சியம்மாள் (60) என்பவருடன் மோட்டார் சைக்கிளில் கோப்பம்பட்டியில் இருந்து நாகன் களத்தூருக்கு சென்று கொண்டிருந்தார். அப்போது அவர்களுக்கு பின்னால் தென்னம்பட்டியை சேர்ந்த காளி என்பவர் ஓட்டி வந்த மினிவேன் எதிர்பாராதவிதமாக மோட்டார் சைக்கிள் மீது பயங்கரமாக மோதியது. இதில் மோட்டார் சைக்கிளில் இருந்து தூக்கி வீசப்பட்ட திருப்பாண்டி மற்றும் பேச்சியம்மாள் ஆகியோர் படுகாயமடைந்தனர். அவர்களை அருகில் இருந்தவர்கள் மீட்டு திண்டுக்கல் அரசு மருத்துவமனையில் சிகிச்சைக்காக சேர்த்தனர். இந்த விபத்து குறித்து வடமதுரை போலீஸ் சப்-இன்ஸ்பெக்டர் கிருஷ்ணவேணி வழக்குப்பதிவு செய்து விசாரணை நடத்தி வருகிறார்.