குப்பைகளுக்கு தீ வைப்பதால் வாகன ஓட்டிகள் அவதி

வேலூரை அடுத்த மேல்மொணவூர் பகுதியில் தேசிய நெடுஞ்சாலையோரம் பலர் குப்பைகள் கொட்டி வருகின்றனர். இதனால் அப்பகுதியில் சுகாதார சீர்கேடு ஏற்பட்டுள்ளது. குறிப்பாக இரவு நேரங்களில் கோழிக்கழிவுகள் உள்ளிட்ட இறைச்சி கழிவுகள் மர்மநபர்களால் கொட்டப்படுகிறது. குப்பைகளை கொட்டியவர்கள் அதை தீவைத்து சென்றுவிடுகின்றனர். இதனால் தீ விடிய, விடிய எரிகிறது. பகலிலும் தீ எரிவதால் அதில் இருந்து புகை வெளியேறி வாகன ஓட்டிகளை அவதியடைய செய்கிறது.

தேசிய நெடுஞ்சாலையில் செல்லும் வாகனங்கள் தெரியாதவாறு புகை சூழ்ந்து கொள்வதால் வாகன ஓட்டிகள் விபத்துகளில் சிக்கும் நிலை ஏற்பட்டுள்ளது. மேலும் அவர்களுக்கு கண் எரிச்சலும் ஏற்படுகிறது.

குப்பைகள் கொட்டுபவர்களை கண்டறிந்து அவர்கள் மீது நடவடிக்கை எடுக்க வேண்டும் என்று அவர்கள் கோரிக்கை வைத்துள்ளனர்.