காவிரி தாயாருக்கு நம்பெருமாள்நாளை சீர்கொடுக்கிறார்

ஸ்ரீரங்கம் அம்மாமண்டபத்தில் காவிரி தாயாருக்கு நம்பெருமாள் நாளை சீர்கொடுக்கிறார்.

சீர்வரிசை

ஸ்ரீரங்கம் ரெங்கநாதர் கோவிலில் ஆண்டு தோறும் ஆடி 18-ம் நாள் அல்லது 28-ம் நாளில் நம்பெருமாள் அம்மா மண்டபம் படித்துறையில் காலை எழுந்தருளி பக்தர்களுக்கு அருள்பாலிப்பார். பின்னர் மாலை காவிரி தாயாருக்கு மங்கலப்பொருட்களை சீர்வரிசையாக கொடுப்பார்.

அதன்படி இந்தாண்டு ஆடி 18-ம் நாளான நாளை (வியாழக்கிழமை) நம்பெருமாள் காவிரி தாயாருக்கு சீர்வரிசை கொடுக்கும் நிகழ்ச்சி நடைபெறுகிறது. இதற்காக நம்பெருமாள் கோவில் மூலஸ்தானத்திலிருந்து காலை 6.30 மணிக்கு தங்கப்பல்லக்கில் புறப்பட்டு வழிநடை உபயங்கள் கண்டருளி காலை 11.30 மணிக்கு அம்மாமண்டபம் ஆஸ்தான மண்டபம் வந்து சேர்வார். அங்கு நம்பெருமாளுக்கு சிறப்பு பூஜைகள் நடைபெறும்.

மங்கல பொருட்கள்

பின்னர் மாலை 4 மணி வரை நம்பெருமாள் பக்தர்களுக்கு அருள்பாலிப்பார். பின்னர் நம்பெருமாள் காவிரி தாயாருக்கு சீர் கொடுக்கும் நிகழ்ச்சி மாலை 4.45 மணிக்கு நடைபெறும். அது சமயம் பட்டுசேலை, மாலை, சந்தனம், தாம்பூலம் உள்ளிட்ட மங்கலப்பொருட்களை கோவில் யானை ஆண்டாள் மீது வைத்து காவிரி படித்துறைக்கு கொண்டு வந்து காவிரி ஆற்றில் விட்டு சீர்வரிசை கொடுக்கும் நிகழ்ச்சி நடைபெறும். இந்நிகழ்ச்சியில் ஏராளமான பக்தர்கள் கலந்து கொள்வர்.

பின்னர் நம்பெருமாள் அம்மாமண்டபத்திலிருந்து இரவு 8.30 மணிக்கு புறப்பட்டு மேலஅடையவளஞ்சான் வீதியில் உள்ள வெளி ஆண்டாள் சன்னதியில் மாலை மாற்றிக்கொண்டு இரவு 9.30 மணிக்கு மூலஸ்தானம் சென்றடைவார். இந்நிகழ்ச்சிக்கான ஏற்பாடுகளை கோவில் இணை ஆணையர் சிவராம்குமார் மற்றும் கோவில் பணியாளர்கள் செய்து வருகின்றனர்.