தர்மபுரியில் கலெக்டர் தேசிய கொடி ஏற்றுகிறார்

தர்மபுரியில் இன்று (திங்கட்கிழமை) சுதந்திர தின விழா கொண்டாடப்படுகிறது. இந்த விழாவில் கலெக்டர் சாந்தி தேசிய கொடி ஏற்றுகிறார்.

சுதந்திர தின விழா

சுதந்திர தின விழா இன்று (திங்கட்கிழமை) தர்மபுரியில் உள்ள மாவட்ட விளையாட்டு அரங்கில் கொண்டாடப்படுகிறது. காலை 9.05 மணிக்கு மாவட்ட கலெக்டர் சாந்தி தேசிய கொடியை ஏற்றி வைத்து போலீசாரின் அணிவகுப்பு மரியாதை ஏற்று கொள்கிறார். தொடர்ந்து பல்வேறு துறைகளின் சார்பில் அரசின் நலத்திட்ட உதவிகளை கலெக்டர் வழங்குகிறார்.

தொடர்ந்து சிறந்த அரசு அலுவலர்களுக்கு நற்சான்றிதழ்களையும் அவர் வழங்குகிறார். பின்னர் பள்ளி மாணவ-மாணவிகளின் கலை நிகழ்ச்சிகள் நடக்கிறது. இந்த விழாவிற்கான ஏற்பாடுகளை மாவட்ட வருவாய் அலுவலர் அனிதா மற்றும் அனைத்து துறை அலுவலர்கள் செய்து வருகிறார்கள். விழாவையொட்டி சுதந்திர போராட்ட தியாகிகளை அவரவரது வீடுகளுக்கு நேரில் சென்று வருவாய்த்துறை அதிகாரிகள் பொன்னாடை போர்த்தி கவுரவிக்க உள்ளனர்.

ஒத்திகை நிகழ்ச்சி

தர்மபுரியில் இன்று நடைபெறும் சுதந்திர தின விழாவை முன்னிட்டு போலீசாரின் அணிவகுப்பு ஒத்திகை நிகழ்ச்சி மாவட்ட விளையாட்டு அரங்கில் நேற்று நடைபெற்றது. இதேபோன்று பள்ளி மாணவ-மாணவிகளின் கலை நிகழ்ச்சிக்கான ஒத்திகையும் நடந்தது. சுதந்திர தின விழாவையொட்டி மாவட்ட விளையாட்டு அரங்கம் மற்றும் நகரின் பல்வேறு பகுதிகளில் பலத்த போலீஸ் பாதுகாப்பு போடப்பட்டுள்ளது.