தேவதானப்பட்டி அருகே வாகனம் மோதி உதவி தோட்டக்கலை அலுவலர் பலி

தேனி மாவட்டம் உத்தமபாளையம் அருகே உள்ள மேலசிந்தலைச்சேரியை சேர்ந்தவர் வீரக்குமார் (வயது 32). இவர், திண்டுக்கல் மாவட்டம் கொடைக்கானல் தோட்டக்கலை துறையில் உதவி தோட்டக்கலை அலுவலராக பணிபுரிந்து வந்தார். நேற்று முன்தினம் திண்டுக்கல்லில் அலுவல் சம்பந்தமாக கூட்டம் ஒன்று நடந்தது. இதில் அவர் பங்கேற்ற பிறகு அங்கிருந்து மொபட்டில் மேலசிந்தலைச்சேரிக்கு வந்து கொண்டிருந்தார்.

பெரியகுளம்-வத்தலக்குண்டு மெயின்ரோட்டில் காட்ரோடு அருகே சென்றபோது அந்த வழியாக வந்த அடையாளம் தெரியாத வாகனம் இவரது மொபட் மீது மோதியது. இதில் தூக்கி வீசப்பட்ட அவர் சம்பவ இடத்திலேயே பரிதாபமாக இறந்தார். இதுகுறித்து தகவல் அறிந்த தேவதானப்பட்டி போலீசார் சம்பவ இடத்திற்கு வந்தனர். பின்னர் வீரக்குமார் உடலை போலீசார் கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.