மொடக்குறிச்சி அருகே பிளஸ்-2 மாணவியை கடத்திய வாலிபர் போக்சோவில் கைது

மொடக்குறிச்சி பகுதியை சேர்ந்தவர் 17 வயது பிளஸ்-2 மாணவி. இவர் கடந்த 24-ந் தேதி பள்ளிக்கூடத்துக்கு சென்றார். அதன்பின்னர் அவர் வீடு திரும்பவில்லை. இதனால் உறவினர்கள் அவரை தேடி வந்தனர். ஆனால் கிடைக்கவில்லை.

இதுகுறித்து மாணவியின் தந்தை மொடக்குறிச்சி போலீஸ் நிலையத்தில் புகார் அளித்தார். அதன்பேரில் போலீசார் வழக்குப்பதிவு செய்து தீவிர விசாரணை நடத்தி வந்தார்கள்.

விசாரணையில் மாணவியை கடலூர் மாவட்டம் பண்ருட்டி அருகே உள்ள மனம் தவித்த புத்தூர் கிராமம் பகுதியை சேர்ந்த தண்டபாணி மகன் சிவகண்டன் (வயது 33) என்பவர் கடத்தி சென்றது தெரியவந்தது. அதைத்தொடர்ந்து அவரையும், மாணவியையும் தேடி வந்தனர்.

இந்த நிலையில் மாணவியுடன் மனம் தவித்த புத்தூர் கிராமத்தில் உள்ள தனது வீட்டில் சிவகண்டன் இருப்பதாக போலீசாருக்கு தகவல் கிடைத்தது. அதைத்தொடர்ந்து போலீசார் அங்கு சென்று சிவகண்டனை பிடித்து விசாரணை நடத்தினார்கள்.

விசாரணையில் அவர் தனக்கும், மாணவிக்கும் செல்போன் மூலம் பழக்கம் ஏற்பட்டு பழகி வந்ததாகவும், தான் கேட்டரிங் வைத்து நடத்தி வருவதாகவும், இந்த நிலையில் மாணவியை கடத்தி சென்றதாகவும் தெரிவித்தார். இதைத்தொடர்ந்து சிவகண்டனை போக்சோ சட்டத்தின் கீழ் போலீசார் வழக்குப்பதிவு செய்து கைது செய்தனர்.

மேலும் அவரிடம் இருந்து மாணவியை மீட்டு பெற்றோரிடம் ஒப்படைத்தனர். கைது செய்யப்பட்ட சிவகண்டன் ஈரோடு கோர்ட்டில் ஆஜர்படுத்தப்பட்டு ஈரோடு கிளை சிறையில் அடைக்கப்பட்டார்.