திருப்பூர் வாலிபரிடம் என்.ஐ.ஏ. அதிகாரிகள் விசாரணை

கோவை கார் வெடிப்பு சம்பவம் தொடர்பாக பலியான ஜமேஷா முபினின் உறவினரான திருப்பூரை சேர்ந்த வாலிபரிடம் என்.ஐ.ஏ. அதிகாரிகள் விசாரணை நடத்தினார்கள்.

முபின் உறவினர்

கோவை கோட்டை ஈஸ்வரன் கோவில் முன்பு நிகழ்ந்த கார் சிலிண்டர் வெடிப்பு சம்பவத்தில் போலீசார் 6 பேரை கைது செய்து சிறையில் அடைத்தனர். இந்த வழக்கு என். ஐ. ஏ. (தேசிய புலனாய்வு முகமை) வசம் ஒப்படைக்கப்பட்டது. இதனிடையே உளவுத்துறை எச்சரிக்கையை தொடர்ந்து நேற்று தமிழகம் முழுவதும் 40-க்கும் மேற்பட்ட இடங்களில் என்.ஐ.ஏ. அதிகாரிகள் சோதனை மேற்கொண்டனர்.

அதன் ஒரு பகுதியாக கார் வெடிப்பு சம்பவத்தில் உயிரிழந்த ஜமேஷா முபினின் உறவினர் திருப்பூரைச் சேர்ந்த முகமது யூசுப் (வயது 37)என்பவரிடம் நேற்று காலை முதல் என்.ஐ.ஏ. அதிகாரிகள் விசாரணை மேற்கொண்டனர்.

3 மணிநேரம் விசாரணை

கோவையில் இருந்து வாடகை கார் மூலம் வந்த என்.ஐ.ஏ. அதிகாரிகள் திருப்பூர் வெங்கடேஸ்வரா நகரில் உள்ள முகமது யூசுப் வீட்டுக்கு சென்று அவரை திருப்பூர் தெற்கு போலீஸ் நிலையம் அழைத்து வந்து 3 மணி நேரமாக விசாரணை மேற்கொண்டனர். முகமது யூசுப்பின் செல்போனை பெற்றும் விசாரணை நடத்தி வருகிறார்கள்