நர்சிங் மாணவி தூக்குப்போட்டு தற்கொலை: பேராசிரியர்கள் 'டார்ச்சர்' கொடுத்ததாக குற்றச்சாட்டு

வேலூர்,

வேலூர் மாவட்டம் குடியாத்தம் டவுன் காமாட்சியம்மன் பேட்டை காமாட்சி அம்மன் நகர் பகுதியை சேர்ந்தவர் குமரேசன். நகை செய்யும் தொழிலாளி. இவரது மகள் கார்த்திகாதேவி (வயது 21). ஆந்திர மாநிலம் சித்தூர் மாவட்டம் அரகொண்டா பகுதியில் உள்ள தனியார் நர்சிங் கல்லூரியில் இறுதி ஆண்டு படித்து வந்தார்.

கல்லூரியில் மாணவி கார்த்திகாதேவிக்கு கல்லூரி துறை தலைவர் மற்றும் பேராசிரியர்கள் தொடர்ந்து பல்வேறு வகையில் 'டார்ச்சர்' கொடுத்ததாக கூறப்படுகிறது. மேலும் பாடப்பிரிவுகளில் 'பெயில்' செய்து விடுவோம் என மிரட்டி வந்ததாக கூறப்படுகிறது.

தூக்குப்போட்டு தற்கொலை

இதுகுறித்து கார்த்திகாதேவி, தனது பெற்றோருக்கு போன் செய்துள்ளார். இதனைத்தொடர்ந்து நேற்றுமுன்தினம் பெற்றோர் சென்று கார்த்திகாதேவியை குடியாத்தத்திற்கு அழைத்து வந்து விட்டனர். இந்தநிலையில் நேற்று காலையில் வீட்டில் உள்ள ஒரு அறையில் மின்விசிறியில் சேலையால் தூக்குப்போட்ட நிலையில் இருந்துள்ளார். இதனை கண்டதும் பெற்றோர் அலறி அடித்துக் கொண்டு கார்த்திகாதேவியை ஆஸ்பத்திரிக்கு கொண்டு சென்றனர். அங்கு டாக்டர்கள் கார்த்திகாதேவியை பரிசோதித்து பார்த்து அவர் ஏற்கனவே இறந்து விட்டதாக தெரிவித்தனர்.

இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

நர்சிங் மாணவி தற்கொலை தொடர்பாக கல்லூரியில் தொடர்ந்து டார்ச்சர் கொடுத்த துறை தலைவர், பேராசிரியர்கள் மீது ஆந்திர போலீசிலும் புகார் அளிக்க மாணவியின் உறவினர்கள் முடிவு செய்துள்ளனர்.