கார் திருட்டு வழக்கில் முதியவர் கைது

நாகர்கோவில்:

நாகர்கோவில் கார் திருட்டு வழக்கில் முதியவர் கைது செய்யப்பட்டார்.

நாகர்கோவில் வடசேரி டென்னிசன் ரோட்டில் கடந்த 3 மாதங்களுக்கு முன்பு வீட்டின் முன்பு நிறுத்தப்பட்டிருந்த கார் ஒன்று திருடப்பட்டது. இதுதொடர்பாக வடசேரி போலீசார் வழக்குப்பதிவு செய்து விசாரணை நடத்தி வந்தனர். மேலும் அந்த பகுதியில் உள்ள கண்காணிப்பு கேமரா காட்சிகளையும் ஆய்வு செய்து விசாரணை நடத்தினர். அப்போது காரை திருடியது களியக்காவிளையைச் சேர்ந்த மணிகண்டன் என்பது தெரியவந்தது. இதைத் தொடர்ந்து அவரை போலீசார் கைது செய்து திருடப்பட்ட காரையும் கைப்பற்றினர்.

இதற்கிடையே கைது செய்யப்பட்ட மணிகண்டனிடம் போலீசார் விசாரணை நடத்திய போது கார் திருட்டு வழக்கில் காஞ்சிரங்குளத்தை சேர்ந்த ஜெயன் (வயது 59) என்பவருக்கும் தொடர்பு இருந்தது தெரியவந்தது. எனவே ஜெயனை போலீசார் தேடி வந்தனர். ஆனால் அவர் போலீசில் சிக்காமல் தலைமறைவாக இருந்து வந்தார். இந்தநிலையில் ஜெயனை தனிப்படை போலீசார் நேற்று முன்தினம் கைது செய்தனர்.

கைதான ஜெயன் நித்திரவிளையில் நடந்த கார் திருட்டு வழக்கிலும் தொடர்புடையவர் என்பதும் போலீஸ் விசாரணையில் அம்பலமானது. இந்த கார் திருட்டில் ஏற்கனவே 4 பேர் கைதான நிலையில் ஜெயனுக்கும் இதில் தொடர்பு உள்ள தகவல் தெரியவந்தது.

பின்னர் அவரை போலீசார் கோர்ட்டில் ஆஜர்படுத்தி சிறையில் அடைத்தனர்.